Manuel Arrieta Irizar zendu da, Indurainen masajista izandakoa
Manuel Arrieta Irizar. 
Manuel Arrieta Irizar Altzako bizilaguna atzo zendu zen, hilaren 10ean, 73 urte zituela. Txirrindularitzaren munduari oso lotuta egon zen Arrieta, Banesto taldeko masajista izan baitzen taldearen garairik onenean, 1990eko hamarkadan, Miguel Indurain txirrindulari nafar ezagunak Frantziako Tourra bost urtez jarraian irabazi zuenean. Garai hartan, Banestoko talde osoa Altzako Lau Aizeta jatetxera joaten zen garaipenak ospatzera, Arrietaren lehengusu batzuena baitzen. Movistar taldeak, Banesto eta Reynolds taldeen oinordekoak, Arrietaren heriotzarengatik doluminak adierazi zituen atzo sare sozialetan: “Besarkada handi bat bidali nahi diegu 1981. eta 2003. urteen artean gure taldeen laguntzaile izan zen Manuel Arrietaren familiari eta lagunei. Gure txirrindularitzaren urrezko arorako funtsezko pertsona bat. Eskerrik asko guztiagatik eta beti arte, Manu, lagun”.
Kataliñene baserriko semea zen Arrieta, eta Altzarekin ere lotura estua izan zuen, eta Altzako Historia Mintegikoek gogoan izan dute: “Pertsona independentea, bere ingurunea zaintzeko borondatez betea, oroitzapenak biltzeko orduan sortzailea. Gutako askok ikusi dugu, gidari gisa bera edukita, bere kirol bizitzaren museo txiki hori, batez ere txirrindularitzari lotua, bere lagunen oroitzapenena, argazkiena, liburuena”. “Altzako Historia Mintegiko bazkidea, beti prest egon da parte hartu duen gertaera altzatarrak jaso eta dokumentatzeko. Manuelen moduko pertsonek, bere diskrezioarekin eta gauza handirik egin ez duela dirudienaren xumetasunarekin, aberastu egiten dute gainerakook geure egunerokotasunaz dugun pertzepzioa oinarritzen dugun gizarte bizitza hori”, gaineratu dute.
Era berean, bitxikeriaren bat gogoratu dute, esaterako, Arrietak eta Indurainek azken honen bizikleta zozkatu zutenekoa, San Martzial eliza konpontzeko dirua biltzeko: “Manuelek une asko utzi dizkigu, hala nola San Martzial jai haiek, Indurainen bizikleta eliza konpontzeko dirua biltzeko zozkatu zenean, edo motokroseko lehiaketetan eta zaleen hainbat eta hainbat txirrindulari lasterketatan parte hartu zuenean”.
Miguel Indurain txirrindularia eta Manuel Arrieta Irizar, 1991n, Altzan, Indurainen bizikleta zozkatu zutenean, San Martzial eliza konpontzeko. (Argazkia: Altzako Historia Mintegia)
