Txuri Urdinek etxean jokatuko du ligako finaleko lehen partida
Txuri Urdineko neskak Valdemororen kontrako partidan. 
Liga irabazteko prest daude Txuri Urdineko neskak. Fase erregular paregabea egin ondoren, finalera iritsi dira Valdemoro kanporatuta finalerdietan. Aldiz, finalean Majadahonda indartsua izango dute. Azken zortzi urtetan emakumezkoen ligako onena izan da, eta Donostiako taldearentzat ez da final erraza izango. Aurrekari gisa, sasoi honetan elkarren aurka jokatu dituzten bi partidak. Majadahondaren pistan 0-4 irabazi zuen Txuri Urdinek, baina Donostian 1-2 gailendu ziren espainiarrak. Finaleko lehen partida etzi jokatuko dute 14:30ean Donostiako izotz pistan.
Saskibaloian, Ibaeta Basketek gaur bertan jokatuko du Gasca kiroldegian Gironaren kontra (20:15). Arerio zaila izango da Donostiako taldearentzat. Izan ere, Girona ligako hirugarren sailkatua da. Dena dela, Euroliga jokatzetik datoz hirira, eta baliteke nekea pilatu izana. Irabaziz gero jauzi nabarmena emango luke sailkapenean Azu Muguruzak gidaturiko taldeak. Bestalde, Gipuzkoa Basketek etziko jokatuko du Mallorcan Palmer Alma taldearen aurka.
Eskubaloian, Bera Berak bihar Valladoliden pistan jokatuko du. Sailkapeneko lehen postuan jarraitzen dute 29 punturekin, baina bat gutxiago du Xixon bigarren sailkatuak. Asturiasko taldea sasoi onean dabil, eta Rocasa indartsuari irabazi zion herenegun. Sailkapeneko distantzia mantendu edo areagotzeko bai ala bai irabazi beharko dute donostiarrek.
Futbolean, Realeko neskek Betis taldearen aurka jokatuko dute bihar. Aukera paregabea dute sailkapeneko bigarren postua egonkortzeko. Izan ere, Atletico Madrilek galdu egin zuen Real Madrilen aurka jokatzeke zuen neurketa. Horrela, bigarren eta hirugarren postuen arteko distantzia bost puntukoa da orain. Eibarri euskal derbian irabazi ostean, txuri-urdinek zelai zail bat bisitatuko dute. Gizonezkoen Realak, berriz, azken deskalabrua ahaztu nahiko du etzi, etxean, Alavesen kontra. Euskal derbia izango da Anoetan erabateko edukiera izango duen denboraldiko lehendabiziko partida.
Belar hockeyan, Realak jardunaldi bikoitza izango du asteburuan. Bihar, Sardineroren kontra ariko dira Santanderren, 13:00etan. Etzi, berriz, Bartzelona hartuko dute Aieten. Denboraldia berrartu ondoren, berdinketa garrantzitsua lortu zuten pasa den asteburuan.
PARTIDAK
Saskibaloia
Emakumezkoen liga, 24. jardunaldia
- Ibaeta Basket – Girona (gaur, 20:15)
Gizonezkoen LEB Oro liga, 23. jardunaldia
- Palmer Alma – Gipuzkoa Basket (igandea, 12:00)
Izotz hockeya
Emakumezkoen ligako finala (lehen neurketa)
- Txuri Urdin – Majadahonda (igandea, 14:30)
Eskubaloia
Emakumezkoen ohorezko maila, 17. jardunaldia
- Valladolid – Bera Bera (larunbata, 19:00)
Futbola
Emakumezkoen lehen maila, 24. jardunaldia
- Betis – Reala (larunbata, 13:00)
Gizonezkoen lehen maila, 28. jardunaldia
- Reala – Alaves (igandea, 18:30)
Belar hockeya
Emakumezkoen ohorezko maila, 11. eta 12. jardunaldiak
- Sardinero – Reala (larunbata, 12:00)
- Reala – Bartzelona (igandea, 13:00)
