Txuri Urdinek historia idazteko asteburua du aurretik
Txuri Urdineko neskak Majadahondari irabazitako partida ospatzen. (Argazkia: Txuri Urdin) 
Abantaila baliatu nahi du Txuri Urdinek emakumezkoen izotz hockey liga irabazteko. Finaleko kanporaketako lehen partida irabazita (4-2), beste garaipen bat behar du historia idazteko. Bihar jokatuko dute bigarren partida Madrilen, eta irabaziz gero titulua etxera ekarriko dute. Aldiz, huts eginez gero, hirugarren neurketa erabakigarria izango dute igandean, Madrilen bertan.
Eskubaloian, Bera Berak berreskuratutako errenta berresteko partida jokatuko du bihar, Gasca kiroldegian. Une honetan, Xixon bigarren sailkatuak baino hiru puntu gehiago dituzte –garaipen bakoitzeko bi puntu batzen dira–. Galiziarrak sailkapeneko hamargarren tokian daude, eta hasiera batean, irabazteko norgehiagoka izan beharko luke. Horrez gain, Bera Bera Valladoliden kontra ariko da Donostian jokatuko den Espainiako Kopako lehen kanporaketan. Apirilaren 29tik maiatzaren 1era bitarte izango da Illunben.
Futbolean, Realeko mutilek soilik jokatuko dute asteburuan. Mikel Oiartzabalen lesio larriaren ostean, txuri-urdinek aurrera begiratu behar dute. Jardunaldi gutxi geratzen dira liga bukatzeko, eta Europako postuetan egonkortzea da jomuga. Horretarako, etzi Sevillaren zelaian punturen bat batu beharko dute. Andaluziako taldea Europa ligatik kanpo geratu berri da, West Hamen kontra galdu ondoren.
Saskibaloian, etxean jokatuko dute hiriko bi taldeek. Batetik, Ibaeta Basketek Campus Promete hartuko du etxean. Herenegun, ligako partida jokatu zuten Bembibreren pistan (59-60), eta irabazi egin zuten. Garaipen horri esker sailkapeneko bosgarren tokian daude donostiarrak. Biharko neurketa ere aproposa da garaipenerako. Gipuzkoa Basketek, berriz, daraman bolada kaskarra eteteko aukera berri bat izango du Illunben, etzi. Halere, arerio zaila izango dute aurrez aurre: Palentzia.
Belar hockeyan, Realak galdu gabe jarraitzeko asmoarekin ariko da etzi eguerdian, Sanse Complutenseren aurka. Pasa den asteburuko jardunaldi bikoitza berdinketa eta garaipen batekin borobildu ondoren, etxetik kanpo ere irabazten ahaleginduko dira.
PARTIDAK
Izotz hockeya
Emakumezkoen ligako finala
- Majadahonda – Txuri Urdin (larunbata, 15:00) *bigarren partida.
- Majadahonda – Txuri Urdin (igandea, 14:45) *hirugarren partida, kanporaketa berdinduko balitz.
Eskubaloia
Emakumezkoen ohorezko maila, 18. jardunaldia
- Bera Bera – Porriño (larunbata, 19:30)
Futbola
Gizonezkoen lehen maila, 29. jardunaldia
- Sevilla – Reala (igandea, 18:30)
Saskibaloia
Emakumezkoen liga, 25. jardunaldia
- Ibaeta Basket – Campus Promete (larunbata, 17:00)
Gizonezkoen LEB Oro liga, 24. jardunaldia
- Gipuzkoa Basket – Palentzia (igandea, 18:00)
Belar hockeya
Emakumezkoen ohorezko maila, 13. jardunaldia
- Sanse Complutense – Reala (igandea, 13:00)
