Alkateari "zaila" iruditzen zaio sorosle zerbitzua urte osoan eskaintzea
Randall Cory Young arraun surflariaren omenezko ekitaldia. 
Arraun surfa egiten ari zela, Zurriolako uretan joan den asteartean hildako Randall Cory Young estatubatuarraren omenezko ekitaldian, hainbat surflarik eskatu zuten hondartza sasoitik harago segurtasuna bermatuko duen zerbitzu bat eskaintzeko hiriko hondartzetan. Eneko Goia alkateak adierazi du “zaila” dela: “Pertsona bat hiltzea gogorra da, eta ulertzen dut min hori. Baina egiten den eskari horri dagokionez, “zaila” ikusten dut. Oso salto handi bat izango litzateke udalak hondartzetan eskaintzen dituen zerbitzuetan, horrek izango lukeen kostu gehigarriarekin, noski”.
Era berean “zuhurtziaz” jokatzearen garrantzia nabarmendu du: “Iruditzen zait norberaren ardura ere kontuan hartu beharra dagoela, eta gertatzen den edozein gauzaren aurrean, ezin dugula ardura besteengan edo udalarengan jarri. Duela ez horrenbeste denbora, antzeko beste gertakari bat izan genuen goizeko lauretan. Horrek zer eskatzen du? Sorosleak egon behar direla goizeko lauretan ere? Norberaren zuhurtziak ere bere garrantzia izan behar du”.
