Realak sailkapenean gora egiteko aukera du
(Argazkia: Reala) 
Sanseren kontra galdu ostean, garaipenaren bidera itzultzeko aukera paregabea izango du etzi Realeko belar hockey taldeak. Terrassa hartuko dute etxean, zazpigarren sailkatua. Txuri-urdinak zortzigarren tokian daude, eta sailkapenean gora egiteko nahitaez irabazi beharko dio Kataluniako taldeari.
Izotz hockeyan, berriz, gizonezkoen Txuri Urdinek kopako final-laurdenetako lehen partida jokatuko du bihar Majadahondaren izotz pistan. Apirilaren 2an, berriz, Jacaren aurka ariko dira, eta apirilaren 9an Huarteren kontra. Ligaxkako bi talde onenak finalerdira sailkatuko dira. Bartzelona eta Puigcerda dagoeneko sailkatuak daude.
Futbolean, Realeko neskak Sporting de Huelvaren zelaian ariko dira etzi. Ligak kendutako hiru puntuak berreskuratuta, sailkapeneko bigarren postua matematikoki berresteko puntu batzuk behar dituzte. Betisen aurka irabazi ostean, beste hiru puntu batzen ahaleginduko dira.
Saskibaloian, Ibaeta Basket kopatik kanpo geratu zen atzo, Perfumerias Avenida talde indartsuaren kontra (60-56). Erronka zaila zuten, eta azken unera arte finalerdietara sailkatzeko modua izan zuten. Azkenik, ordea, lehiatik kanpo geratu ziren.
PARTIDAK
Belar hockeya
Emakumezkoen ohorezko maila, 14. jardunaldia
- Reala – Terrassa (igandea, 10:30)
Izotz hockeya
Gizonezkoen kopako final-laurdenak
- Majadahonda – Txuri Urdin (larunbata, 22:00)
Futbola
Emakumezkoen lehen maila, 25. jardunaldia
- Sporting de Huelva – Reala (igandea, 12:00)
