Dantzaren Hilabeteak jarduera guztiak berreskuratu ditu
Dantza Hilabetearen aurkezpena. (Argazkia: Donostia Kultura) 
Gipuzkoako Dantza Profesionalen Elkarteak jarduera eta jarduera guztiak berreskuratu ditu aurtengo Dantzaren Hilabetea aurrera eramateko. Apirilaren 29an ospatzen den Dantzaren Nazioarteko Egunaren harira, Donostian hainbat jarduera antolatu dituzte.
Apirilaren 2an, XIV. Dantza Kalean jaialdia egingo dute, Alderdi Ederreko lorategietan (17:00). Hamahiru eskolak eta 361 dantzarik parte hartuko dute, eta hainbat estilotako piezak dantzatuko dituzte: garaikidea, jazz, neoklasikoa, bollywood, klasikoa, hip hop eta Ekialdeko folklorea.
Apirilaren 3an, XXIV. Kontxako Baranda erakustaldia egingo dute. Txikien baranda 11:00etatik 11:30era izango da, Nautikotik Kontxako kafetegiraino. Maila ertaineko baranda 11:50etik 12:20era egingo dute, Nautikotik Kontxako kafetegiraino. Eta, azkenik, nagusien baranda 12:45etik 13:30era izango da Nautikotik Kontxako kafetegiraino. Alderdi Ederreko lorategietan ere jarriko dira. Guztira, 30 irakasleren 1.299 ikaslek parte hartuko dute. Gipuzkoako zenbait herritako 23 dantza eskolatakoak eta Bizkaiko bi herritakoak dira.
Apirilaren 30ean, XIX. Dantza Saria emango dute Donostiako Udaletxeko Osoko Bilkuren aretoan. Iker Arrue dantzariak eta Lide Aranak jasoko dute, 12:00etan hasiko den ekitaldian.
Nazioarteko eguneko gala
Maiatzaren 1ean egingo dute XXV. Dantzaren Nazioarteko Eguneko gala, Viktoria Eugenia antzokian. Bi saio izango ditu; lehena 12:00etan eta bigarren 19:00etan. Galak dantza estilo sorta zabala erakutsiko du, dantzari eta konpainien lankidetza altruistari esker, hemengo dantzari eta taldeen presentzia nabariarekin. 25. edizioan zenbait dantza estilo izango dira ikuskizunean: neoklasikoa, dantza garaikidea, dantza estilizatua/flamenkoa eta dantza neotradizionala.
Galan parte hartzen duten artisten artean, kanpotik etorritako gonbidatuak izango dira: Lucia Lacarra eta Matthew Golding –biak ere ibilbide ezagun eta luzekoak nazioartean–, Asier Edeso eta Mimoza Koibe –Montecarloko Balletetako dantzariak–, Jone San Martin –dantzari, koreografo eta performer donostiarra–, Aitor Arrieta– English National Ballet-eko dantzari nagusia– eta Katja Kaniukova, Hodei Iriarte Kaperotxipi –2016ko GDPEaren Errebelazio Saria– eta Urko Fernandez Marzana –Gasteizko dantzaria–, Baionako Illicite konpainia, Iker Rodriguez donostiarra –Espainiako Dantza Konpainia Nazionaleko dantzaria–, Bilboko M.M.Flamencodantza konpainia eta Donostiako Aukeran dantza konpainia. Sarreren prezioak 8, 15 eta 20 eurokoak dira. Helbide honetan eta Viktoria Eugeniako zein Antzoki Zaharreko leihatiletan eskuratu daitezke.
