Realari ligako bost partida falta zaizkio denboraldia borobiltzeko
(Argazkia: Reala) 
Realeko neskek eskura dute datorren denboraldian Europan jokatzea. Sailkapeneko bigarren tokian daude, eta hirugarrenarekiko zazpi puntuko aldea dute. Bost partida falta dira liga bukatzeko, eta okerrik ezean, helburua beteko dute. Etxetik kanpo azken unean Sporting de Huelvari irabazi ondoren, bihar eguerdian Madrilen aurka ariko dira Zubietan. Komeni da Madril eta Real Madril bereiztea, bi talde desberdin direlako. Madril sailkapenaren putzuan dago, 13. postuan. Gizonezkoen Reala, berriz, astelehenean itzuliko da lehiara. Anoetan jokatuko dute Espanyolen kontra, eta nesken antzera, azken txanpan dena eman beharko dute Europako postuetan bukatzeko.
Eskubaloian, Bera Berak Granollersen kontra jokatuko du bihar arratsaldean. Zazpi jardunaldi falta dira liga bukatzeko, eta lidergoan sendo daude donostiarrak. Horrela ere, tentuz ibili beharko dute, hilabete bukaeran kopa jokatuko dutelako. Ligakoa ahaztu gabe, Illunbeko kopa txapelketan ere emaitza ona lortzea dute helburu.
Saskibaloian, Ibaeta Basketek azken porrota ahaztu nahiko du igandean, Leganesen pistan. Izan ere, asteazkenean jokatu zuten Perfumerias Avenidaren kontra, eta galdu egin zuten (68-54). Madrilera egingo duten bisita baliatu dezakete ligan garaipenaren bidera itzultzeko.
Belar hockeyan, Realak Juniorren zelaian jokatuko du igandean, eta azken bolada onari jarraipena emateko aukera ona dute. Izotz hockeyan, berriz, Txuri Urdineko mutilek kopako bigarren neurketa izango dute bihar, Jacaren pistan. Lehen partida galduta, bai ala bai irabazi behar dute txapelketan aukeraren bat izateko.
PARTIDAK
Futbola
Emakumezkoen lehen maila, 26. jardunaldia
- Reala – Madril (larunbata, 12:30)
Gizonezkoen lehen maila, 30. jardunaldia
- Reala – Espanyol (astelehena, 21:00)
Eskubaloia
Emakumezkoen ohorezko maila, 20. jardunaldia
- Bera Bera – Granollers (larunbata, 18:00)
Saskibaloia
Emakumezkoen liga, 27. jardunaldia
- Leganes – Ibaeta Basket (igandea, 18:00)
Belar hockeya
Emakumezkoen ohorezko maila, 15. jardunaldia
- Junior – Reala (igandea, 12:30)
Izotz hockeya
Gizonezkoen kopako final-laurdenak
- Jaca – Txuri Urdin (larunbata, 21:30)
