Elkarrekin Donostiak hiriko berdeguneak handitzeko neurriak eskatu ditu
Antondegiko berdegunea. (Argazkia: Haritzalde) 
Donostiako berdeguneak eta landa eremuak “kentzen dituzten” hirigintza proiektuak ugaritzen ari direla ohartarazi du Elkarrekin Donostiak. Hori dela eta, udal gobernuari eskatu diote hiriaren premiei buruzko diagnostiko bat egiteko, “eta neurriak har ditzatela berdeguneak areagotzeko”.
Haizea Garai zinegotziak nabarmendu duenez, udal gobernuak hiriko berdeguneak kentzearen aldeko “apustu irmoa” egiten du: “Hala nola, Antondegiko olatu igerilekuarekin, Belartzako logistika azpiegiturarekin eta Basque Culinary Center-en egoitza berriarekin”. Eremu berde horiek “ezabatzea” kezkagarria iruditzen zaio udal taldeari. “Gainera, duela gutxi jakin dugu Turismoa sailak Artikutzan turismo ostatu bat sortzea sustatu nahi duela”, adierazi du Garaik. “Gobernuak ingurune naturala aztertzeko leku gisa sal dezake, baina gobernuaren ebazpenak berak dio ostatuaren eraikina birgaitu behar dela erabilera turistikoa emateko. Bere jarduerak finkaren beharrezko oreka eta zaintza hausteak kezkatzen gaitu, azken finean, Artikutzakoa bezalako ingurune natural babestu batean izan dezakeen inpaktua”.
Donostiako Udala garatzen ari den urbanizazioen inguruan ere hitz egin du Garaik: “Jolastokietako urbanizazioa ikusita, non ez den zuhaitzik landatu eta sortutako espazio publikoa hormigoian oinarrituta dagoela, ezinbestekotzat jotzen dugu espazio berdeen galerari buruzko hausnarketa sakona egitea; uste dugu beharrezkoa dela hiriaren egoeraren diagnostikoa egitea eta Donostian berdegune gehiago egotea lortzeko neurriak hartzea, horiek funtsezkoak baitira osasun onerako”.
OMEren gomendioak
Berdeguneetarako sarbide unibertsalari buruz Osasunaren Mundu Erakundeak (OME) emandako gomendioei eutsi dio udal taldeak. Izan ere, erakundeak adierazi du gutxienez 0,5 hektarea neurtuko dituen berdegune bat egon behar dela lerro zuzenean, bizileku bakoitzetik 300 metro baino gutxiagora. “Horregatik, diagnostiko bat behar dugu, jakiteko ea Donostiako auzo guztietan betetzen diren gomendio horiek, eta, era berean, uste dugu neurri zuzentzaileak hartu behar direla hormigoiak bultzatutako hirigintza proiektuak gauzatzen ari diren tokian. Hiriak dituen birika berdeak mantendu behar ditugu, Antondegi eta Belartza kasu, eta ez, udal gobernuak nahi duen bezala, babestutako eremu naturalak ustiatu eta suntsitu, eta hori onartezina da”.
