Europako postuengatik lehiatzeko neurketa garrantzitsua
Alexander Isak, Bartzelonaren aurkako partida batean. (Argazkia: Reala) 
Realak partida garrantzitsu bat jokatuko du gaur gauean Anoetan (21:30): Bartzelona izango du bisitari, eta Europako postuengatik lehiatzen jarraitzeko berebiziko garrantzia du neurketak. Izan ere, txuri-urdinak ligako seigarrenak dira, eta katalanak hirugarrenak. Bosgarren postutik gorako taldeek jokatuko dituzte Europako txapelketak datorren denboraldian –bosgarrenak Europa liga eta besteek Txapeldunen Liga–, eta Reala bosgarren sailkatutik, Betisetik, bi puntura dago. Bartzelonak, aldiz, bost puntu ateratzen dizkio Realari; beraz, Imanol Alguacilen taldeak neurketa hau irabaziko balu, presio handia egingo luke Europako postuetan.
Bartzelonaren aurka jokatzea ez da erraza izaten, baina Xavi Hernandezen taldea ez dator bere unerik onenean. Klubaren gorabehera ekonomikoak eta Leo Messiren irteera medio, denboraldi txarra egiten ari dira hasieratik, eta berriki bolada on bat izan badute ere, azken asteotan ligari agur esan diote –Real Madrilek hemezortzi puntu gehiago ditu–, eta Europa ligatik kanpo gelditu dira. Gainera, astelehenean, ligan jokatu zuten azken neurketan, Cadizen aurka galdu zuten; talde andaluziarra bigarren mailara ez jaisteko lehiatzen ari da. Horrez gain, Gerard Pique jokalariaren inguruan azken astean argitaratu diren informazioek ere hautsak harrotu dituzte; hain zuzen ere, Espainiako Futbol Federazioko presidente Luis Rubialesen eta Piqueren arteko audio batzuk argitaratu ditu El Confidencial hedabideak, eta agerian gelditu da Piquek eta bere enpresa Kosmosek Espainiako Superkopa Saudi Arabiara eramateko bitartekaritza lanak egin zituztela, komisioen inguruko elkarrizketak tarteko.
Reala ere ez dago bere momenturik onenean, golak egitea asko kostatzen ari baitzaio, eta David Silva eta Mikel Oiartzabal gabe iritsiko da gaueko partidara. Horrela ere, Europako postuen lehian oso bizirik jarraitzen du, eta hutsean berdindu zuen pasa den ostiralean Betisen aurka, bere aurkari zuzenenaren aurka. Txuri-urdinei sei partida gelditzen zaizkie liga amaitzeko, eta sei final izango dira.
