Añorga Txikin dago Gipuzkoako egile hanburgesa berritzailerik onena
Gipuzkoako I. Egile Hanburgesaren Lehiaketako irabazleak. (Argazkia: Gipuzkoako Egile Hanburgesaren Lehiaketa) 
Hanburgesaren Nazioarteko Egunaren harira, Gipuzkoako Merkatariak eta Harakinak erakundeek Gipuzkoak I. Egile Hanburgesaren Lehiaketa antolatu dute Eibarren, eta sarietako bat Donostiara etorri da. Hain zuzen ere, bi kategoriatan lehiatu dira hamalau udalerritako –Aretxabaleta, Arrasate, Azpeitia, Beasain, Donostia, Eibar, Ibarra, Lasarte, Ordizia, Orio, Tolosa, Usurbil, Zarautz eta Zumaia– 28 harategi eta urdaitegi: egile hanburgesa tradizionalaren kategorian eta egile hanburgesa berritzailearenean. Hain zuzen ere, egile hanburgesa berritzailearen lehenengo saria eskuratu du Añorga Txikiko Arteaga harategiak.
Kategoria tradizionalean, aldiz, Usurbilgo Otar Goxo harategiak irabazi du, eta Tolosako Arozena eta Altuna harategiak izan dira bigarren eta hirugarren sailkatuak, hurrenez hurren. Hanburgesa berritzaileen kategorian, Goierriko Oiarbide harategia izan da bigarren onena, eta Egiako Endika harategia hirugarrena. Beraz, bi harategi donostiarreko hanburgesak daude Gipuzkoako hiru egile hanburgesa berritzaile onenen artean: Arteaga eta Endika harategietakoak.
Epaimahaia aditu hauek osatu dute: Krabelin hoteleko jatetxeko sukaldari Mireia Alonsok, Lasa jatetxeko sukaldari Koldo Lasak, Laiatekeko Fermin Pinzolasek eta Juanjo Larrañaga harakin erretiratuak. Horrez gain, sari banaketa ekitaldian parte hartu dute Xabier Arruti Gipuzkoako Foru Aldundiko Nekazaritza eta Lurralde Orekako zuzendari nagusiak, Harakinak elkarteko presidente Mikel Urrestarazuk eta Eibarko alkate Jon Iraolak.
Egitasmoa Eibarko Udalak, Gipuzkoako Foru Aldundiak, Eusko Jaurlaritzak eta Comercial Hostelera enpresak babestu dute, eta Gipuzkoako okinen elkarteak lehiaketa eta dastaketak egiteko ogia eman du. Gipuzkoako harategi eta urdaitegi txikietako lehengaien kalitatea nabarmentzea eta horietako produktuen kontsumoa sustatzea izan da lehiaketaren helburua. Bestalde, “egile hanburgesa” kontzeptuak honakoari egiten dio erreferentzia, antolatzaileen esanetan: “Produktuaren kalitate gorena eta prestatzen dutenen ezagutza handia. Kasu askotan, belaunaldiz belaunaldi sektore horretan aritu diren familietako kideak dira hanburgesa hauen egile, eta euren jakintza zabalak produktuaren bikaintasuna bermatzen du”.
