Kaiko 3. zenbakian dago Ttipia taberna berria. (Argazkia: Inaxio Esnaola) Parte Zaharrean Bizi auzo elkarteak ohar bat plazaratu du kaiko Ttipia taberna eta jatetxe berriaren ingurukoa. Portuko 3. zenbakian dagoen ostalaritza establezimenduak urteak zeramatzan jarduerarik gabe. Ordea, Donostiako Udalak ez zion jarduera lizentzia kendu, auzo elkarteak kritikatu duenez: «Udal ordenantzaren arabera, jarduteko lizentziak iraungitzat joko dira jarduera utzi eta sei hilabete igaro ondoren. Udalak ezer egin ez zuenez, berriro ireki da».
Hain zuzen ere, eraikina birgaitu ondoren ireki dute Ttipia taberna. Udalak baimendu zuen ostalaritza establezimendua duen eraikina bitan banatzea. Jabeak «negozio ona» egin duela dio auzo elkarteak: «Beheko solairuak eta lehenak ostalaritzako erabilera dute, eta bigarrenak eta hirugarrenak bizileku izaera. Establezimenduaren komunak lehen solairuan daude, eta eskailera batzuk igo behar dira. Ez dute irisgarritasuna bermatzen».
Ttipia tabernak 5,08 metro karratuko azalera du establezimendu barruan, eta terraza handi bat dauka. Terraza hori jartzeko, kaiko espazio publikoa «mugatu eta berrantolatu» dutela salatu du auzo elkarteak: «Txiringitoa baimendu diote. Hor dago, guztion espazioan jarrita onura pribatua lortzeko. Instalatuta zeuden jarleku publikoak alde batera baztertu dira terrazak leku hori hartu ahal izateko».
Kaiko Ttipia tabernaren terrazarengatik inguruko espazio publikoa berrantolatu dute. (Argazkia: Inaxio Esnaola)
Horrekin batera, terrazarako eskakizun akustikorik ez dagoela kritikatu dute: “Udalak lokalean isolamendu akustikoari buruz ordenantzan ezarritako eskakizunak betetzen direla justifikatzeko eskatu dio. Baina, ez da ezer eskatzen jarduera benetan garatuko den lekuari dagokionez”.
