Frankismoaren biktimen udal bulegoa irekitzeko proposamena egin dute LABek eta Goldatuk
(Argazkia: LAB) 
Donostian frankismoaren biktimen bulego bat irekitzea proposatu dute gaur Goldatu Taldeak eta LAB sindikatuak. “1936ko uztailaren 18an matxinatutako militarrek Donostiako 400 herritar hil zituzten bertako kaleetan, urte bereko irailaren 13an gure hiria militarki okupatu ondoren”, adierazi dute prentsaurreko batean, eta gutxienez 24 udal langile hil zirela azpimarratu dute.
Aipatutako kolektibo horiek Donostiako Udalak 2016ko abenduaren 19an Bozeramaileen Batzordean onartutako adierazpen instituzionalera igorri dira, eta bertan adierazi dute borondate irmoa dutela Instrukzioko Epaitegietan kereila kriminal bat aurkezteko, “diktadura frankistak udalerri horretako bizilagunei eragindako gizateriaren aurkako krimenak iker daitezen”.
Goldatu Taldeak eta LAB sindikatuak uste dute “Udalak ebazpen hori bete behar duela” eta kereila jarri behar duela Buenos Airesko (Argentinako Errepublika) 1 zenbakiko Epaitegiko titularra den Maria Servini de Cubria epaileak hasitako 4591/10 auzian, matxinatutako militarrek hildako langileen eta udal-ordezkarien ordezkari gisa.
“Azken urteotan, Memoria Historikoaren Kontseilu Sektoriala buru-belarri aritu da lanean hiria hartu ondoren frankisten biktima izan ziren udal-langile guztiak ikertzen eta zehazten, eta gutxienez 24 pertsona erail zituzten. Kopuru beldurgarri hori nahikoa da, luzamendurik gabe, izapideak hasteko eta krimen horiengatik dagozkion kereila judizialak jartzeko”, adierazi dute Goldatu Taldeko ordezkariek eta LAB sindikatuak gaur goizean.
Era berean, bertaratutakoek proposatu dute Frankismoaren Biktimen Udal Bulego bat irekitzea, Donostiako biktima guztien lekukotza pertsonalak eta familiakoak jasotzeko, hain zuzen ere, gerra garaian jasandako eraso frankista oro, gerraostea eta haren ondorengo diktadura urte guztiak salatu nahi dituzten biktima guztien testigantzak.
