Gipuzkoa plazan ez da herriarteko autobus geltokirik izango 2023tik aurrera
Donostiako Udalak Foruen pasealekuan terminalak jartzea proposatu dio Gipuzkoako Aldundiari. Linea batzuek Atotxako geltokia erabili beharko dute.
Lurraldebuseko autobus bat Gipuzkoa Plazan.Irutxuloko Hitza 
Gipuzkoa plazak ez du herriarteko autobus geltokirik hartuko, eta geltoki horiek “beste leku batera” eraman beharko dira. Horrela dio Donostiako Tokiko Gobernu Batzordeak atzo onartutako alegazio-idazkiak, Bidasoa Behea eta Oarsoaldea eskualdeetako garraioaren zerbitzu publiko erregularra emateko aurreproiektuari eta aldundiak Donostiarekin dituen loturei buruzkoak.
Gipuzkoa plazak hainbat autobus geltokitako terminala (Errenteria, Pasai Antxo, San Pedro, Irun eta Hondarribiko aireportua) hartzeari uko egitea Datorren Donostia mugikortasun planean oinarritzen da, “Arreta oinezkoen, txirrindularien eta garraio publikoa erabiltzen duten herritarren mugikortasuna hobetzean jarriko baitu”, alegazioen idazkiak dioenez.
Noticias de Gipuzkoa-k jasotzen duenez, dokumentuak gaineratzen du herriarteko autobusek beste leku bat izan beharko dutela geltokien agertoki gisa 2023ko udazkenetik aurrera, gutxi gorabehera. Udal proposamena Eneko Goia alkateak aurkeztu zion Rafaela Romero Mugikortasuneko foru diputatuari, eta, bertan, Foruen pasealekuko parkeak eta Espainia plazak osatzen duten espazioa egokitzea da asmoa.
Gainera, udalak gogorarazi du linea batzuek Atotxako autobus geltokia erabili beharko dutela (BI02 Hondarribiko aireportura; BI01 Donostia-Pasaia-Errenteria-Irun-Hondarribia; eta BI03, Donostia-Pasaia-Errenteria-Irun), “salbuespena behar bezala izapidetu ezean”. Aipatutako eskualdeetako gainerako lineek Erdialdeko geltokia izan behar dute, Gipuzkoa plaza ez dena.
Eraldaketa “mailakatua eta progresiboa” izango da, eta San Martin eta Zubieta kaleen zirkulazioaren noranzkoarekin hasiko da. “Trafiko aldaketa horiei esker, bizitegi lehentasuneko eremu bat sortuko da hiriaren erdigunean, egoiliarren eta baimendunen ibilgailuak bakarrik sar daitezen bertara, eta zentroa ekialde-mendebalde konexioak igarotzeko bide gisa erabiltzea saihestuko da”, adierazi du Udalak.
