Udalak Bizikletaren Behatokia desegitea erabaki duela jakinarazi du Kalapiek
Donostiako Udal Gobernuak Donostiako Kalapie hiriko txirrindularien elkartearekin zuen lankidetza etetea erabaki du. Elkarteak berak jakinarazi du ohar baten bidez.
“Aldez aurretik abisatu gabe” izan dela gaineratu dute. Udalak Bizikletaren Behatokia desegitea erabaki duela adierazi dio elkarteari idazki baten bidez. “Hemezortzi urtez hitzarmena sinatu ondoren, eta arrazoiak argi eta garbi aipatu gabe, jakinarazi digute behatoki hori mugikortasun aktiboaren aldeko beste behatoki baten barruan sartuko dela, eta arrazoirik gabe, bertan parte hartuko ez dugula”, azaldu du elkarteak.
Udal gobernuarekin 2017tik lankidetza “eskasa” izan dutela nabarmendu dute: “Inoiz ez zaigu proiektuen parte hartze aktibo edo pasiborik egin, eta are gehiago, pandemiaren hasieratik, eta hiri eredua aldatzea gehien behar zenean, Kalapiek hainbat aldiz estutu du eskua, baina udalak gure lankidetza eta ekarpenak baztertu besterik ez du egin, eta kasu askotan hauek entzun ere ez”.
Datorren Donostia mugikortasun planari dagokionez, Kalapiek adierazi du udalak oraindik ez dela elkartu beraiekin, bilera “esplizitu” bat eskatu arren. “Ohartarazi nahi dugu ‘Datorren Donostia’ proiektua, ustez oinezkoen espazioak berreskuratzeko eta bizikleten mugikortasuna hobetzeko helburua duena, dagoeneko mugikortasun pribatuaren eta motordunaren aldeko kolektiboekin landu dela. Ez da harritzekoa, proiektuak bi aho baititu”.
Kalapiek aitortu du hiriaren erdiguneko eremu gutxi batzuk berriz diseinatu direla, “oinezkoentzako bihurtzeko edo bidegorri zatiren bat eraikitzeko”. Halere, ideia nagusia zirkulazioa kudeatzea dela gaineratu dute, “ibilgailu pribatu motordunak hiriaren bihotzeraino iritsi ahal izateko”. “Ikuspegia oso anbizio txikikoa da, eta, neurri handi batean, ez du lagunduko egungo zirkulazio arazoa eta horrek erdigunean eta inguruetan dituen ondorio larriak arintzen”.
Bukatzeko, udalari zorte ona opa diote bere plangintzetan eta jardueretan. Dena dela, gogorarazi nahi diote “nekez” lortuko dituela gizarteak eskatzen dituen helburuak betetzea Kalapie gisako eragilerik gabe: “Izan ere, Kalapiek, hiri honen historia berrienean, ekarpen handia egin du, garrantzi handiko aldaketekin eta herritarrentzako onurekin”.
