Udalak txirrindulariak eta garraio publikoa lehenesteko konpromisoa hartuko du
Bi txirrindulari, Kontxa pasealekuko bidegorrian. (Argazkia: Irutxuloko Hitza) 
Elkarrekin Donostia pozik agertu da udaleko osoko bilkurak Gipuzkoako hiriburuko mugikortasunari buruz aurkeztu dituen proposamenetako bi aho batez onartu dituelako, baita etorkizunean Emisio Baxuen Eremua sortzeari buruzkoak ere. Donostiako erdigunean ingurune berri hori diseinatzerakoan oinezkoak, txirrindulariak eta garraio publikoa lehenesteko konpromisoa hartu du Udalak.
Era berean, udalak, Elkarrekin Donostiak eskatuta, Gipuzkoako Foru Aldundiarekin batera lan egingo du hiriarteko autobusen geralekuak Bizitegi Lehentasunaren Eremu horretan non kokatuko diren planifikatzeko, gaur egun eskaintzen den zerbitzuaren maila bermatuz edo hobetuz.
Aitzole Araneta Elkarrekin Donostiaren bozeramaileak udal gobernuaren jarrera kritikatu du, “donostiarrak ez ezik, Gipuzkoatik datozen pertsona guztiak ere zentrotik bota nahi izatea” eta horrela, hiriaren gentrifikazioan aurrera egitea leporatuta. Hala ere, Aranetak aitortu du, osoko bilkura amaitu ondoren, oso urrats positiboa dela etorkizuneko Emisio Baxuen Eremu horretan lanean jarraitzeko borondate hori aho batez erakustea.
“Zoritxarrez, gaur goizeko osoko bilkuran koalizioak ez du lortu tokiko gobernuak emakumeen parte-hartzeari jarritako betoa kentzeko konpromiso irmoa hartzea, nahiz eta udal espazioa izan, Eguzki kirol instalazioan”, adierazi du. Elkarrekin Donostiak ziurtatu du legea betetzeko borrokan jarraituko duela, eta ulertezintzat jo du korporazioaren erantzuna, mozio hori errefusatu baitu.
