"Espazioa okupatu nahi dugu, baina beti gozamenetik"
Alargun Beltzak talde gipuzkoarrak Aste Nagusi Piratan joko du hilaren 16an, Flamenka gunean (18:30), eta "inoiz baino gehiago entseatzen" ari direla kontatu dute. Elektro txaranga ezohiko bat da, eta harrera ezin hobea izan du beti Donostian jo duenean: Intxaurrondoko Letaman gaztetxean, Feministaldian, Loiolako jaietan, eta abar. Emakumez* osatutako talde bat den heinean, "espazioa okupatzeko asmoa" dutela nabarmendu dute, eta jendea "gozatzera" gonbidatu dute.
Alargun Beltzak taldea, Oiartzunen, bere entsegu gunean. Goian, ezker-eskuin: Intza, Alex, Rebeca, Irati, Ane eta Uxue. Behean, ezker-eskuin: Maddi, Ekhine, Izaro eta Maialen. (Argazkia: Beñat Parra) 
Aste Nagusi Piratan jotzeko gogoz zaudete?
Inoiz baino gehiago ari gara entseatzen! Urduri bezain gogotsu gaude, esan beharra dago; lo egiteko zailtasunak ditugu batzuok [barrez].
Nola iritsi zitzaizuen proposamena?
Sardiñeren kofradiako batek ezagutzen gintuen, besteak beste, duela hilabete batzuk Donostiako Feministaldian ikusi gintuztelako, Egian. Hortik iritsi zitzaigun proposamena.
Donostian gero eta jende gehiagok ezagutzen du taldea, ezta? Feministaldian jotzeaz gain, Intxaurrondon ere jo zenuten duela hilabete batzuk, esaterako.
Bai, gero eta gehiago. Loiolako jaietan ere jo genuen, esaterako. Jendeari egiten duguna gustatzen ari zaiola uste dugu, edo behintzat ez digute kontrakoa esan [barrez]. Eta, gainera, beste leku batzuetan jotzeko kontratatzen gaituzte. Hernanin, Lasarten, Andoainen eta Urnietan ere jo izan dugu; Buruntzaldean, oro har, han ere gustatzen zaie egiten duguna! Eta, Bilbotik ere jarri dira gurekin harremanetan. Proposamen dezente ditugu, baina horrenbeste taldekide garenez, zaila da denak koordinatzea.
Egia da, baita ere, duela urtebete hasi ginela jotzen, Trintxerpeko taberna batean. Gero Intxaurrondoko Letaman gaztetxean pare bat aldiz jo genuen, eta Aste Nagusi Piratan gaude orain. Hori guztia, urte batean. Harrera ona izan da, beraz. Letaman gaztetxean jo genuenean, ez ginen denak barruan sartzen, eta kanpoan jo behar izan genuen; euria ari zuen, baina jendea hor egon zen gurekin, izugarria izan zen.
Bestalde, kalean jotzera ohituta gaude, baina Loiolako jaietan proposatu ziguten agertoki gainean jotzea, eta erronka gisa hartu genuen, baina baita Aste Nagusi Piratara begira entsegu gisa.
Alde handia dago zuentzat kalean jotzetik agertoki batean jotzera?
Hasieran ezetz esan genuen, hain zuzen. Egia da, ordea, ez garela ohiko elektro txaranga bat, errepertorio aldetik behintzat. Eta, nahiko estatikoak gara. Azkenean, ohiko elektro txaranga batek plataforma moduko bat eramaten du, eta guk ez daukagu horrelakorik, prekarioak gara oraindik; horregatik, nahiko estatikoak gara.
Zer moduz joan dira Flamenkako kontzertura begirako entseguak?
Ondo! Trikitiarekin topera gabiltza, berez gurekin jotzen duen trikitilariak ezin duelako Aste Nagusi Piratan jotzen dugun egunean kontzertura etorri, eta Uxue etorri delako haren ordez. Bestea ere Uxue deitzen da, beraz, ez da nahasketarik egongo! [barrez].
Ezustekoren bat egongo da astearteko kontzertuan?
Ezustekoa guretzat, batez ere! [barrez]. Baina bai, gauza berri batzuk baditugu. Orain arte gure kontzertuetara beti etorri direnez gure jarraitzaile leialenak, senideak eta lagunak, beraientzako abesti berriak sartzea pentsatu dugu. Hiruzpalau abesti berri joko ditugu.
Egia da, baita ere, agertoki erraldoi horretan jotzea erronka bat dela guretzako. Izan ere, ez da gauza bera kalean jotzea, jendea gertu-gertu edukita, edo hor goian. Beraz, lantzen ari gara nola hautsi pixka bat estatikotasun hori, jendearekin interakzio pixka bat gehiago izateko. Hainbeste taldekide garenez, denoi protagonismoa ematen saiatuko gara: abesti batzuetan taldekide batzuk jarriko dira aurrean, beste batzuetan beste batzuk, eta abar. Kalean jotzen dugunean, badaude ikusleen artean sartu zaitezkeen une batzuk, baina agertoki batean zaudenean ikusleei begira zaude une oro, beraz, beste formula batzuk bilatu behar dira.
Donostiako Piraten mugimenduan sartuta ibili zarete edo zabiltzate?
Taldekide bat Sardiñerak kofradian dabil, eta beste bat Eskandalosan ibili izan da, baina kofradia hori desegin egin da aurten. Baina bueno, parrandan ibili izan gara, eta asteartean ere han egingo dugu parranda, kontzertuaren ondoren. Erraz desfasatuko gara!
Kontzertu gehiago dituzue Aste Nagusi Pirataren ondoren?
Ezkontza batean joko dugu hilaren 27an, eta irailerako ere badaukagu zerbait itxita. Proposamenak ditugu, baina aspaldi iritsi zitzaizkigun, eta adostu genuen abuztuan zehaztea irailerako kontzertuak, hobeto jakingo dugulako noiz egongo garen libre eta noiz ez. Bestalde, kontzertuen ondoren beti proposamen gehiago iristen zaizkigu, eta uste dugu Aste Nagusi Piratan jo ondoren ere proposamenak iritsiko zaizkigula.
Zer aurkituko du jendeak astearteko kontzertuan?
Etor daitezela! Gure asmoa da musikaren bitartez halako espazioak okupatzea, guk denok sentitu izan dugulako musika giroa nahiko maskulinoa izan dugula inguruan, eta horregatik ikusleak gure proposamenera gonbidatzen ditugu. Eta, gozatzera ere bai! Espazioa okupatu nahi dugu, baina beti gozamenetik.
Alargun Beltzak taldeak Flamenkan joko dute abestietako bat jo du IRUTXULOKO HITZA-rentzat, eta jarraian ikus dezakezue, bideoan:
