Añorga Txikiko jaietan pilota jaialdia egingo dute auzoko pilotariekin
Irailaren 2an eta 3an egingo dituzte festak, eta prestatu duten egitarauak hainbat aldaketa izango ditu 2019ko jaiekin alderatuta.
(Argazkia: Añorga Txikitarrak auzo elkartea) 
Urrun geratu da 2019. urte hura, azkenekoz Añorga Txikiko festak antolatu zituzten urtea. Beste auzoetan gertatu antzera, bukatu da itxaronaldia eta normaltasunez egin ahal izango dituzte Añorga Txikin ere festak.
Hainbat berritasun dituen egitaraua antolatu dute auzotarrek, eta horien artetik nabarmentzekoa da irailaren 2ko pilota jaialdia. Batetik, lehen aldia delako, eta, bestetik, Añorgako pilotarien artekoa izango delako. Urmeneta-Manterola V eta Matxain III-Eraunzeta parez pare ariko dira Añorga Txikiko frontoian. Aldiz, egingo ez dutena goitiberen jaitsiera izango da. Denboraz estu ibili dira antolatzeko, eta ez dituzte egingo.
2019 hartan estreinatu zuten txosna frontoian, eta horri eutsiko diote. Baita haurren bizkotxo txapelketari ere, lehen edizioak harrera ona izan ostean. Horrez gain, ohiko patata tortilla txapelketa eta paella herrikoia egingo dituzte.
Añorga Txikiko jaietako 2019ko paella herrikoia. (Argazkia: Añorga Txikitarrak auzo elkartea)
Hona hemen Añorga Txikiko jaietako egitarau osoa:
Irailak 2, ostirala
- 18:00. Txupinazoa auzoko lokalean.
- 18:10. Haur jolasak ikastolan.
- 18:30. Txokolate jana eta II. Haurren Bizkotxo Txapelketa ikastolan.
- 19:00. Pilota jaialdia Añorga Txikiko frontoian: Urmeneta-Manterola V / Matxain III-Eraunzeta.
- 20:00. Mozorro Poteo Herrikoia. Gaia: 1970eko hamarkada.
- 22:30 Mus txapelketa azkarra Atotxa Erreka elkartean.
- 22:30. Txosnaren irekiera frontoian.
- 23:30. Karaoke herrikoia frontoian.
Irailak 3, larunbata
- 10:00. Haur jolasak ikastolan
- 11:00. Añorgako Erraldoi eta Buruhandiak.
- 12:00. Sagardo eta sardina dastaketa.
- 13:00. Patata tortilla txapelketa.
- 14:00. Sari banaketa.
- 14:30. Paella herrikoia (aldez aurretik apuntatu behar da).
- 15:30. Jaien aldeko bingoa.
- 15:30-19:30. Puzgarriak kanpan (gaztelua, …).
- 19:30. Poteo herrikoia musikarekin.
- 23:00. Kontzertua frontoian: Indabe.
- 00:30. DJa frontoian.
Irailak 4, igandea
- Denak garbitzera.
