Realak laugarrenez irabazi du Euskal Herria Kopa
Realeko jokalariak Euskal Herria Koparen garaikurrarekin. (Argazkia: Urola Kostako Hitza) 
Atzo jokatu zen XII. Euskal Herria Koparen finala Azkoitiako Txerloia futbol zelaian. Realak 4 eta 1 gainditu zuen Alaves, partida lehiatuan. Txuri-urdinak jarri ziren aurretik Jensen aurrelari norvegiarraren golari esker, baina gutxira berdindu zuten arabarrek Armengolen bitartez. Berdinketarekin iritsi ziren atsedenaldira. Bigarren zatian, berriz, Realak gora egin zuen eta Jensenek bere bigarren gola egin zuen. Azken hamar minutuetan borobildu zuten markagailua txuri-urdinek Maddiren eta Vilesen golekin. Laugarren aldiz irabazi du kopa Realak. Liga hasteko aurrekari ona da, datorren larunbatean jokatuko dutelako lehen partida Atletico Madrilen kontra.
Hain zuzen ere, Realeko mutilek Atletico Madrilen bisita izan zuten Anoetan, pasa den larunbatean. Bana berdindu zuten neurketa intentsua jokatu ostean. Madrildarrak partida hasi eta gutxira jarri ziren aurretik, Morataren golarekin. Txuri-urdinak ez ziren kikildu eta berdinketaren bila ibili ziren, ate aurrean asmatu gabe. Arerioak ere aukerak izan zituen errenta areagotzeko. Azkenik, ordea, Umar Sadiq fitxaketa berrienak berdindu zuen norgehiagoka burukada indartsu bati esker. Puntu garrantzitsua lortu zuen Realak, guztira zazpi batzeko eta sailkapeneko goiko aldean mantentzeko.
Eskubaloian, Bera Berak porrot batekin hasi zuen liga larunbatean, Gaska kiroldegian. Malaga oso fin aritu zen ate aurrean, eta aukerak ondo baliatu zituzten Donostiako taldea menderatzeko. Joan-etorriko partida izan zen, eta Bera Berak jokalari batzuen falta nabaritu zuen. Izan ere, Menendez, Cavo eta Gilenek ez zuten jokatzerik izan. Ez da ligari hasiera emateko modurik onena, baina eurek esan moduan, hasi baino ez da egin.
EMAITZAK
Futbola
Euskal Herria Koparen finala
- Reala 4 – Alaves 1
Gizonezkoen lehen maila, 4. jardunaldia
- Reala 1 – Atletico Madril 1
Eskubaloia
Emakumezkoen ohorezko maila, 1. jardunaldia
- Bera Bera 31 – Malaga 32
