Elkarrekin Podemos-Ezker Batuak Onkologikoaren "desegite progresiboa" salatu du
Elkarrekin Podemos-Ezker Batuako ordezkariak Onkologikoan. 
Enpresa-batzordeak gonbidatuta, David Soto, Podemos Euskadiko Antolakuntza idazkaria eta Elkarrekin Podemos-Ezker Batuako legebiltzar-taldeko kideak, eta Javier Busselo Gipuzkoako batzarkideak Onkologikoa bisitatu zuten atzo, zentro horrek egun bizi duen “abandonu-egoera bertatik bertara ezagutzeko”, adierazi dutenez. Ondoren, Onkologikoko Paziente eta Erabiltzaileen Elkarteko arduradunekin hitz egiteko aukera izan zuten, eta urriaren 15ean Donostian egingo den manifestazioaren alde agertu ziren.
Enpresa Batzordeak Onkologikoa “gutxiegi erabiltzen ari dela” eta ospitale monografiko izatetik “erradioterapiako, zainketa aringarrietako eta medikuntza nuklearreko probetara mugatzen ari den zentro batera igaro dela” salatu du. “Zalantzarik gabe, eta Elkarrekin Podemos-Ezker Batuako buruzagiek zuzenean egiaztatu ahal izan duten bezala, horrek eragina du osasun-laguntzaren kalitatean, eta, beraz, pazienteak jasotzen duen zerbitzua hondatzen ari da”, azaldu dute.
Horrez gain, Onkologikora egindako bisita eten egin zela salatu dute, “zentroko zuzendaritzak eskatuta, arduradun politikoei bisita bertan behera utzi eta Onkologikotik joan behar izan zutelako”. Kanpora ateratakoan, Elkarrekin Podemos-Ezker Batuako ordezkariek Onkologikoko Paziente eta Erabiltzaileen Elkarteko ordezkariekin hitz egin ahal izan zuten, eta euren “ezinegona” adierazi zieten, “zentroa eraitsi dutela” uste baitute. Elkarte horrek salatu zuenez, gaur egun, duela lau urte ez bezala, koordinazio falta dago gaixotasunen diagnostikoan eta tratamenduan bertan, eta horrek, zuzenean, eraginkortasuna, denbora, asistentzia-kalitatea eta pribatutasuna galtzea dakar.
Aldarrikapen horiek Elkarrekin Podemos-Ezker Batuako ordezkarien babesa jaso zuten, eta taldea prest agertu zen pazienteen kolektibo horrek egingo dituen hurrengo mobilizazioekin bat egiteko.
