DBHko ikasleentzako Tiktokeko bideo lehiaketa abiatu du Bagerak
Bagera elkarteak Tiktokeko bideo baten bidez eman du lehiaketaren berri. (Argazkia: Bagera) 
Bagera Euskaltzaleen Elkarteak bideo lehiaketa bat antolatu du DBHko ikasleentzat, Tiktok plataforman. Tiktoken aurki daitezkeen euskal abestietako edozein aukeratu behar da, horrekin minutu bateko dantza bat sortu, bideoan grabatu, eta elkartearen Tiktok kontura bidali, azaroaren 18a baino lehen. Bideoarekin batera, parte hartzailearen datuak bidali behar dira.
Jasotzen dituzten bideo guztien artean, hainbat sari banatuko dituzte. Alde batetik, epaimahaikideek 325 euroko bi sari emango dituzte, Nortek informatika dendan gastatzeko. Bestetik, ikusleen bideorik gustukoenak 200 euroko saria jasoko du, denda berean gastatzeko. Bagerakoek Tiktoken bidez eman dute lehiaketaren berri, eta hemen ikus dezakezue igo duten bideoa. Gainera, Sua Enparantza aktore donostiarrak gazteak lehiaketan parte hartzera animatu ditu, bideo baten bidez.
