Antiguako turistifikazioa salatzeko informazio banaketa egin dute
Heriz plataformak eta Bizilagunekinek elkarlanean kanpaina bat abiatu dute Antiguan.
Gaur goizean, Antigua salgai izenburua duen eskuorri bat banatu dute auzoko ehunka buzoitan. Izan ere, Antiguak azken urteotan bizi duen turistifikazioaren berri eman nahi diete auzotarrei. “Ehunka ostatu plaza jarri dituzte Antiguan urte gutxian. Bizilagunek soinuak, elkarbizitza arazoak, espazio publikoaren okupazioa, trafiko arazoak eta abar sufritzen dituzte, gutxi batzuen negozioagatik”, ohartarazi dute.
Ehundaka ostatu plaza jarri dituzte Antiguan urte gutxitan. Bizilagunek soinuak, elkarbizitza arazoak, espazio publikoaren okupazioa, trafiko arazoak eta abar sufritzen dituzte, gutxi batzuen negozioagatik.#AntiguaSalgai #HerizPlataforma #Donostia #DesazkundeTuristikorantz pic.twitter.com/oPKu1ebfQ5
— BiziLagunEkin (@BiziLagunEkin) November 19, 2022
Koisi ostatuak eragindako arazoek jarraitzen dutela nabarmendu dute, eta aurki 302 plazako beste aterpetxe turistiko bat irekiko dutela. Sukia eta Matia kaleen artean kokatu dute ostatu hori, eta irekitzean auzoko arazoak areagotuko direla diote bi plataformek: “Dagoeneko hiru ostatu ditugu Matia kalean eta Heriz pasealekuan; guztira, 400 turista har ditzakete. Hiruak aterpetxe intentsiboak dira. 22 oheko logelak dituzte. Eta hiru aterpetxe hauetatik bakar batek ere ez du bezeroentzako aparkalekurik”.
Auzoak bizi duen egoerari aurre egiteko, auzotarrak babesteko antolatzen ari direla adierazi dute: “Guztion artean birpentsatu behar dugu turismoak gure hirian eta auzoan zein paper bete behar duen”. Horrela, auzotar guztiak “denon artean sortu nahi genukeen auzoan pentsatzera” animatu nahi ditu Heriz plataformak. Harremanetan jartzeko posta elektroniko bat zabaldu dute: herizplataforma@gmail.com.
