Dultzaina doinu sentituak
Ikasbide kultur elkarteak antolatuta, Fernando Bermejo dultzaineroaren omenezko topaketa egin dute Amara Berrin.
Fernando Bermejo dultzaineroaren omenaldiko familia argazkia. 
Kaleak eta plazak dultzainarekin alaitzea gustuko zuen, eta, orain, haren hutsunea nabari da. Fernando Bermejo dultzaineroa 2020ko apirilaren 28an zendu zen, 64 urte zituela. Sortzez Tolosakoa zen, baina Donostian egin zuen bere bizitza; zehazki, Amara Berrin. Ikasbide kultur elkarteko bazkide eta eragilea izan zen, eta elkarteak berak omenaldi berezi bat egin dio gaur goizean.
Euriak eta hotzak ez du Bermejoren omenezko dultzaineroen topaketa sentitua galarazi. Amara Berri, Bidebieta, Pasaia, Oiartzun, Hernani eta Oliteko (Nafarroa) dultzaineroak elkartu dira. Hiru taldetan banatuta, kaleak eta plazak dultzaina doinuekin alaitu dituzte.
Hiru taldeak Bermejo bizi zen etxearen atarian elkartu dira, eta han talde bakoitzak pieza bana jo du. Ondoren, Bermejoren alargunari eta seme-alabei oroigarri bat eman diete.
