Espetxeratu dute ustez Lukas Agirre hil zuen gaztea
Lukas Agirreren hilketaren kontrako elkarretaratzea. (Argazkia: Xalba Ramirez) 
Lukas Agirreren hilketaren egilea delakoan, espetxean sartu dute atxilotuta zegoen 24 urteko gazte donostiarra. Atxilotutako beste bi lagunak behin-behinean aske utzi dituzte.
Erasoa abenduaren 25ean gertatu zen, 06:20ak aldera, Okendo plazan. 24 urteko biktimak hainbat labankada jaso zituen eta bertan hil zen. Ordubete geroago, Donostiako Udaltzaingoak 26 urteko gizona eta 28 urteko emakumea atxilotu zituen Hondarribia kalean, eta, 10:00ak aldera, 24 urteko beste gaztea bere borondatez entregatu zen Ertzaintzaren komisarian.
Atxilotuak asteazkenean eraman zituzten Donostiako epaitegietara, 10:15ean, baina, dirudienez, deklarazioak 13:00ak arte ez ziren hasi, eta egun osoa iraun zuten, harik eta, 20:00ak aldera, kasua ikertzen ari den epaileak haietako bat espetxeratzeko eta beste biak kautelazko neurriekin aske uzteko aginduak eman zituen arte.
Ekitaldian, bi udalerrietako alkateez eta agintari ugariez gain, Lukas Agirre Izkoren ama, zenbait lagun eta beste senide batzuk ere izan ziren, eta ehunka herritarren txaloak jaso zituzten.
