Elke Karsten eta Marie Louis jokalariak fitxatu ditu Bera Berak
Elke Karsten eta Marie Louis eskubaloi jokalariak. (Argazkia: Bera Bera) 
Bera Berak ezkerraldea indartu du bi fitxaketekin: Elke Karsten argentinarra eta Marie Louis frantziarra. Biak Frantziako Bourg de Peage taldean aritu dira orain arte, eta klub horrek izandako arazo ekonomikoengatik libre iritsiko dira Donostiara. Ostegunean, hilaren 5ean, lehen entrenamendua egingo dute Bera Berarekin.
Karstenen bigarren esperientzia izango da Donostian. Izan ere, 2017-2018 eta 2018-2019 denboraldiak Bera Berarekin egin zituen 27 urteko jokalariak. Guztira, 237 gol egin zituen Donostiako taldearekin. Ordutik, beste hainbat klubekin aritu da: Hungariako DVSC Schaeffler, Norvegiako Molde eta Frantziako Bourg de Peage.
Louisek, berriz, 22 urte ditu. Paris eskualdeko hainbat taldetan egon ondoren, 18 urte zituela Besançoneko Prestakuntza Zentrora batu zen, eta 2021-2022 denboraldian egin zuen bat Peageko Bourg Zentroarekin.
Sasoi honetan, Karstenek 17 gol egin ditu bost partidatan, eta Louisek, 20 gol zazpi neurketatan. “Argentinarrak Bera Berari baliabide gehiago eskaintzen dizkio erasoan, eta frantziarrak ezker hegala indartuko du Laura Hernandezekin batera. Louisen abiadura aprobetxatu nahi du Bera Berak”, azaldu du klubak.
