Marisol Garmendiak abiatu du hauteskunde kanpaina: "Donostiak kolore eta herritarren energiaz distiratzea nahi dut"
Marisol Garmendia, hauteskunde programa osatzeko kanpainaren aurkezpenean. (Argazkia: PSE-EE) 
PSE-EEren Donostiako alkategaiak hainbat komunikazio bide ireki ditu donostiarrek beren ekarpenak egin ditzaten hauteskunde programa osatzeko. Hainbat auzotan aurrez aurre egingo dituzten topaketetan entzungo ditu herritarrak, bai webgunearen bidez, baita hiritarren postontzietan banatuko den inprimaki baten bidez ere.
“Herritarrei ahotsa eta protagonismoa emateko helburuarekin”, Marisol Garmendiak proposamenak, ideiak eta proiektuak entzuteko eta biltzeko prozesu bat martxan jarri du, datorren maiatzaren 28ko udal hauteskundeetako PSE-EEren “hauteskunde programa zehazteko balioko duena”, adierazi duenez. Proposamenak, Donostiako hainbat auzotan bizilagunekin egingo diren topaketetan aurrez aurre aurkezteaz gain, hirian zehar postontzietan jarriko dituzten inprimaki baten bidez aurkeztu ahal izango dira.
Marisol Garmendiak adierazi duen bezala “gure programa Donostiako herritarren benetako beharrei lotuta egotea nahi dugu. Auzo bakoitzak ezaugarri bereziak ditu, eta hobekien ezagutzen dituztenak bertako auzotarrak dira. Haien ekarpenak, iritziak eta kritikak oso lagungarriak izango zaizkigu hiriaren errealitateari lotutako hauteskunde-programa bat osatzeko. Donostia auzo guzti-guztiek osatzen dute, eta horiek ezinbesteko elementuak dira gizartearen oreka eta kohesiorako”.
PSE-EEren Donostiako alkategaiak hitz orokorrak erabili ditu euren programa defendatzeko: “Donostiak kolore eta herritarren energiaz distiratzea nahi dut, auzo guztietan ongizatea, segurtasuna, aurrerapena, gizalegea, kultura, kohesioa eta gizarteratzea handitzeko. Eta gure programaren proposamenei aurre eginez lortuko dugu, izan ere, pertsonak, donostiarrak, gure politiken erdigunea dira”, Garmendiaren esanetan.
Kanpaina honetan, auzo bakoitzak hiriaren puzzlea osatzen duen kolorezko pieza bat ordezkatzen duen mapa aurkeztu dute. Marisol Garmendia hautagai sozialistak, Donostiako hainbat eremutara egingo dituen bisitetan topagune fisiko bat egongo da, bertaratzen diren herritarrek ekarpenak egin ahal izateko. Pieza horietan iradokizunak idatzi eta proposamenak eta eskaerak aurkeztu ahal izango dituzte. Lehen saioa, ostiral honetan, hilak 13, egingo dute Altzan.
