Otsailetik ekainera egingo dituzte merkatarientzako eta ostalarientzako euskara ikastaroak
(Argazkia: Joseba Parron San Sebastian)Joseba Parron San Sebastian 
Donostiako Udaleko Euskara Zerbitzuak, hiriko merkataritza eta ostalaritza elkarte eta erakundeekin –Gipuzkoako Ostalaritza Elkartea, San Sebastian Shops eta Gipuzkoako Merkatarien Federazioa– lankidetzan, urtean bitan antolatzen ditu sektore horietako profesionalei zuzendutako euskara ikastaroak: otsailetik ekainera eta urritik abendura.
Otsailetik aurrera eskainiko diren ikastaroak 60 ordukoak izango dira eta ikasle bakoitzak 60 euro ordaindu beharko ditu. Izena emateko epea otsailaren 8ra arte zabalik egongo da, eta bi modutara egin daiteke: online eta Euskara Zerbitzuaren bulegoan. Ikastaroak hiriko euskaltegietan emango dira (AEK, Ilazki, Hitzez, Legazpi 6, Urrats eta Urumea).
Ikastaro horien azken helburua jendaurreko zerbitzua euskaraz emateko gaitasuna lortzea da eta bezero euskaldunei arreta hobea eskaintzea. Horretarako, batetik, hasiera mailako ikastaroak eskainiko dira eta horietan zerbitzua euskaraz ematen hasteko oinarrizko komunikazio gaitasuna landuko da. Bestetik, jarraipen mailako ikastaroak ere izango dira aukeran, bezeroekiko harremanetan nahiz, oro har, laneko harremanetan euskara erabili ahal izateko.
