Liderrak etxean jokatuko du
Bera Berak Granollers hartuko du bihar, Gaska kiroldegian. Ohorezko mailako lehen postua indartzeko partida izango da.
(Argazkia: Bera Bera) 
Hilabete luze bat pasa da Bera Berak azkenekoz etxean jokatu zuenetik. Jarraitzaileek bihar izango dute taldea Gaska kiroldegian ikusteko. Granollersen kontra ariko dira 18:00etatik aurrera. Etena ederki baliatu dute ligako partidari aurre egiteko. Arerioa sailkapeneko putzuan sartuta dago, eta puntu premiarekin etorriko dira. Bera Berak, ordea, bereari eutsi eta lidergoa sendotzeko aukera izango du. Une honetan, bost puntuko abantaila dute Rocasa bigarren sailkatuarekiko.
Saskibaloian, Ibaeta Basketek berriz ere etxetik kanpo jokatuko du. Perfumerias Avenidaren pistan galdu ostean, euskal derbia jokatuko dute bihar (20:00). Gernika bosgarren sailkatuari aurre egin beharko diote, eta ez da batere partida erraza izango. Une honetan, donostiarrak sailkapeneko hamargarren tokian daude, denboraldi irregularraren ondorioz.
Futbolean, bestelako emaitza espero dute Realeko neskek. Oraindik oso presente dute Real Madrilen kontrako porrota (4-1), eta antzeko arerio bat dute zain: Madril. Hiri berean jokatuko dute, beraz, txuri-urdinek. Etzi izango da 12:00etan, eta sekulako erronka izango da beraientzat. Batez ere, min hartuta dauden jokalarien zerrenda behar baino gehiago handitu delako azkenaldian. Horrela ere, lehiakide zuzen baten kontra hiru puntuak lortzeko garrantziarekin ariko dira. Gizonezkoen taldeak, berriz, Anoetan jokatuko du etzi Valladoliden aurka (18:30).
Eta bukatzeko, izotz hockeyan, Txuri Urdineko neskek kopako final-zortzirenetako kanporaketak jokatuko dituzte etxean, bihar eta etzi. Batetik, Milenio Panthers izango dute arerio, eta, bestetik, Huarte. Sasoiko lehen garaipena lortzeko aukera ona izango dute.
PARTIDAK
Eskubaloia
Emakumezkoen ohorezko maila, 13. jardunaldia
- Bera Bera – Granollers (bihar, 18:00)
Saskibaloia
Emakumezkoen liga, 20. jardunaldia
- Gernika – Ibaeta Basket (bihar, 20:00)
Futbola
Emakumezkoen liga, 18. jardunaldia
- Madril – Reala (etzi, 12:00)
Gizonezkoen liga, 20. jardunaldia
- Reala – Valladolid (etzi, 18:30)
Izotz hockeya
Emakumezkoen kopa
- Txuri Urdin – Milenio Panthers (bihar, 14:30)
- Txuri Urdin – Huarte (etzi, 14:30)
