Tolosako inauterien festarekin bat egingo du Bera Berak
Bera Bera eta Granollerse taldeen arteko neurketa. (Argazkia: Bera Bera) 
Bera Bera eskubaloi taldeak Tolosako inauterietan jokatuko du bihar ligako partida. Etxeko talde gisa ariko dira Usabal kiroldegian, eta Errioxa izango dute arerio (18:15). Sailkapeneko lehen postuari eusteko neurketa garrantzitsua izango da. Une honetan, sei puntuko aldea ateratzen diete Malaga bigarrenari eta Porriño hirugarrenari.
Saskibaloian, Ibaeta Basketek Bartzelonaren kontra galdu zuen atzo Gaska kiroldegian (68-69). Neurketa oso parekatua izan zen, baina ez zuten lortu kataluniarrak mendean hartzea. Porrota ahazteko aukera igandean izango dute. Araskiren kontrako euskal derbia jokatuko dute Gasteizen (18:00). Sailkapenean aurretik daude arabarrak.
Futbolean, Realak Celta hartuko du bihar Anoetan (14:00). Iragan astelehenean Espanyolen zelaian urrezko hiru puntu eskuratu ondoren, txuri-urdinek etxeko lanak egin nahi izango dituzte. Batez ere, sailkapen nagusiko hirugarren postua egonkortzen jarraitzeko.
Azkenik, izotz hockeyan, Txuri Urdineko mutilek liga erregularreko azken aurreko neurketa jokatuko dute. Puigcerdaren kontra ariko dira haien pistan, bihar, 22:00etan. Irabaziz gero, sailkapen nagusian Kataluniako taldearekin berdinduko lukete.
PARTIDAK
Eskubaloia
Emakumezkoen ohorezko maila, 15. jardunaldia
- Bera Bera – Errioxa (larunbata, 18:15).
Saskibaloia
Emakumezkoen liga, 22. jardunaldia
- Araski – Ibaeta Basket (igandea, 18:00).
Futbola
Gizonezkoen liga, 22. jardunaldia
- Reala – Celta (larunbata, 14:00).
Izotz hockeya
Gizonezkoen liga, 19. jardunaldia
- Puigcerda – Txuri Urdin (larunbata, 22:00).
