Burua altxa ezinda dabil Reala
Realaren eta Atletico Madrilen arteko partida, Zubietan.Reala 
Ez da jardunaldi ona izan Realarentzat. Neskek Atletico Madrilen kontra galdu zuten Zubietan, partida parekatua jokatu ondoren (1-2). Sailkapenak agintzen du emakumezkoen ligan, eta aurretik dauden madrildarrek ate aurrean duten abilezia baliatu zuten hiru puntuak eramateko. Partida hasi eta berehala aurreratu ziren markagailuan, baina gutxira berdindu zuen Amaiur Sarriegi aurrelari donostiarrak. Aldiz, bigarren zati hasieran gauza bera gertatu zen, eta Atletico Madrilen irabazteko behar zuen gol hori egin zuen. Berdinketa gertu izan zuten txuri-urdinek, baina ez zuten arerioaren ate aurrean asmatu. Hogei partida jokatuta, Reala zortzigarren postuan dago 26 punturekin.
Gizonezkoek, berriz, beste aukera on bat pasatzen utzi zuten Anoetan, pasa den ostiralean. Cadizen kontra berdindu zuten (0-0), neurketa nahiko txarra jokatuta. Ez ziren gai izan gol aukera apurrak aprobetxatzeko, eta andaluziarrek gutxiagorekin sari potoloa eskura izan zuten. Zutoinak salbatu zuen talde txuri-urdina. Berdinketarekin, eta Atletico Madrilen garaipenarekin, sailkapeneko hirugarren postua galdu du Realak, aipaturiko taldearen mesedetan. Orain, laugarren tokian daude 44 punturekin. Ligako bolada petrala ahazteko aukera izango dute ostegunean Europa ligan. Erromaren aurka ariko dira italiarren estadioan, 18:45ean.
Saskibaloian, Ibaeta Basketek amore eman zuen Zaragozaren aurrean. Ligako talde indartsuenetako bat da Aragoikoa, eta beraien pistan erakutsi ahal izan zuten. Azu Muguruzaren taldeak ohiko irregulartasuna erakutsi zuen partidan. Porrot honekin, sailkapenean zertxobait jausi dira donostiarrak. Hamabigarren postuan daude orain 34 punturekin.
Azkenik, izotz hockeyan, Txuri Urdineko neskek ez zuten ezusteko onik eman kopako final-laurdenetan. Ligako fase erregularrean gertatu moduan, maila apalean aritu ziren (6-1), Valdemoro arerioaren menpean. Guztira, hiru dira kopan jokatuko dituzten neurketak, eta lehen biak galduta ez dute aukerarik hurrengo fasera iristeko. Horrela ere, hirugarren eta azken partida jokatuko dute larunbatean Huarteren kontra.
EMAITZAK
Futbola
Emakumezkoen liga, 20. jardunaldia
- Reala 1 – Atletico Madril 2
Gizonezkoen liga, 24. jardunaldia
- Reala 0 – Cadiz 0
Saskibaloia
Emakumezkoen liga, 24. jardunaldia
- Zaragoza 71 – Ibaeta Basket 59
Izotz hockeya
Emakumezkoen kopako final-laurdenak, bigarren jardunaldia
- Quimeras Valdemoro 6 – Txuri Urdin 1
