Erromarako bidean galdu dira
Hegaldi batek izandako atzerapenagatik, zale txuri-urdin batzuk ez ziren Europa ligako partidara iritsi. Jokalariak bai, baina noraezean aritu ziren zelaian.
Realaren eta Erromaren arteko joaneko partida. (Argazkia: Reala) 
Ezinezkoa dela uste du gehiengoak. Hau da, ez dela posible final-zortzirenetako joaneko partidan lorturiko emaitzari buelta ematea. Realak 2 eta 0 galdu zuen atzo Erroman, hango talde sendoaren aurka, eta Europa ligan jarraitzeko aukerak nabarmen txikitu zaizkio. Izan ere, talde txikia izaten jarraitzen du horrelako txapelketa eta kanporaketetan.
Kontraeraso batean iritsi zen gaueko lehen gola. Realeko defentsa lo geratu zen, eta Erromak egindako jokaldi on bati bukaera hobea eman zion El Shaarawyk. Bidean galtzen hasi ziren txuri-urdinak, ez zirelako gai izan markagailua berdintzeko. Take Kubok abagune garbia izan zuen, baina baloia zutoinera bidali zuen. Bigarren zatian, Realak baloiaren jabetzari eutsi zion, baina jokorik proposatu gabe. Merinok beste aukera garbi bat izan zuen Rui Patricioren aurrean, baina nafarrak ere ez zuen asmatu. Aldiz, etxeko taldeak ez zuen barkatu, eta korner baten bidez, bakar-bakarrik errematatu zuen baloia sareetara Kumbullak. Hor bukatu zen partida, eta akaso kanporaketa.
Datorren ostegunean argituko da Realak Europako bidean jarraitzen duen ala ez. Joaneko neurketa lehiatua izango da Anoetan jokatuko dena, eta txuri-urdinek balentria bat behar dute finalerdietarako txartela ziurtatzeko.
