Anoeta betetzeko euskal derbia
Realak eta Athleticek elkarren aurka jokatuko dute igandean (12:00). Derbietako bolada onari jarraipena eman nahi diote txuri-urdinek.
Realak eta Athleticek Anoetan jokaturiko derbietako bat. (Argazkia: Reala) 
Nerea Eizagirre kapitainak eta Natalia Arroyo entrenatzaileak adierazi duten moduan, “derbia beti da berezia”. Are bereziagoa, berriz, harmailak betetzen badira. Etzi jokatuko dute aipaturiko euskal derbia Realak eta Athleticek Anoeta futbol zelaian. Denboraldiko derbi guztiak irabazi ostean, beste bat gehitu nahi dute txuri-urdinek. San Mamesen Reala izan zen nagusi (1-3), eta garaipena errepikatzen ahaleginduko dira azken porrot mingarriaren ostean. Gizonezkoen Realak ere igandean berrartuko du liga, Vila-realen etxean (18:30). Ligako etena pasata, ligako aurreko jardunaldian lorturiko beharrezko garaipenari jarraipena eman nahi izango diote.
Eskubaloian, Bera Berak ligako fase erregularren lehen postua ziurtatua dauka. Dena dela, oraindik bi partida geratzen dira. Bihar, Rocasa Kanaria Handia izango dute aurrez aurre (20:15), hirugarren sailkatua. Azken denboraldietan arerio gogorrena izan da donostiarrentzat, baina aurten ez dira maila berean aritu. Dena dela, irabazten saiatuko dira sailkapeneko bigarren postua jokoan dutelako Malagarekin. Ligako fase erregularreko azken partida, berriz,, apirilaren 15ean jokatuko dute Zuazoren kontra, Gaska kiroldegian.
Izotz hockeyan, Txuri Urdin kopako bigarren puntua batzen saiatuko da bihar, Iruñean (21:45). Lehen partida irabazi eta bigarrena galdu ondoren, hirugarrenarekin garaipenaren bidera itzuli nahi dute. Batez ere, Puigcerdaren kontrako jipoia ahazteko.
Azkenik, belar hockeyan, ligako partida izango du Realak. Kopan arerio izan zuen Sanse Complutenseren aurka ariko dira. Kopako joko eta emaitza bera errepikatzen badute –0-2 menderatu zituzten–, ligan goiko postuetara begira jartzeko aukera izango dute.
PARTIDAK
Futbola
Emakumezkoen liga, 24. jardunaldia
- Reala – Athletic (igandea, 12:00).
Gizonezkoen liga, 27. jardunaldia
- Vila-real – Reala (igandea, 18:30)
Eskubaloia
Emakumezkoen ohorezko maila, 21. jardunaldia
- Rocasa Kanaria Handia – Bera Bera (larunbata, 20:15)
Izotz hockeya
Gizonezkoen kopako final-laurdenak, hirugarren jardunaldia
- Huarte – Txuri Urdin (larunbata, 21:45)
Belar hockeya
Emakumezkoen ohorezko maila, 14. jardunaldia
- Sanse Complutense – Reala (larunbata, 13:00)
