Derbia irabaztea helburu
Mikel Oiartzabal Realeko kapitaina joaneko derbiko gol bat ospatzen. (Argazkia: Reala) 
Joanekoan Anoetan egin zuten moduan (3-1), Imanol Alguacilen mutilek Athelticen aurkako derbia irabazi nahi dute larunbatean, San Mamesen. Realak bere jokalari guztiak ditu partidarako prest, Sadiqen salbuespen bakarrarekin. Horrela, Alguacilek bere hamaikakorik onena zelairatu ahalko du San Mamesen, hiru puntuak Donostiara ekartzeko helburu argiarekin. Ligako sailkapenari erreparatuz gero, Reala da faboritoa, baina derbiak zerotik hasten dira beti, eta Ernesto Valverderen mutilek ez dizkiete gauzak erraz jarriko txuri-urdinei.
Futbolarekin jarraituz, Realeko neskek Alhamaren etxean jokatuko dute larunbatean, Murtzian, eta hiru puntuak etxera ekartzea izango dute helburu, azken aldiko bolada kaskarra mozteko. Izan ere, Levanteren aurka 4-1 galdu zuten duela bi jardunaldi, eta Athleticen aurkako derbian puntu bakarra baino ez zuten atera azken jardunaldian. Sailkapeneko beheko postuetan dago Alhama, eta, beraz, garaipena eskuratzeko aukera ezin hobea dute Natalia Arroyoren neskek.
Belar hockeyan, garaipenaren bidera bueltatzeko helburu argia du Realak, hainbat aste baitaramatza irabazi gabe. Etxean jokatuko dute Pozueloren aurka, igandean, eta irabazteko aukera paregabea da, ligako azkena baita Pozuelo. Txuri-urdinak seigarren postuan daude, eta sailkapenean gora egin nahi dute, lehenengo laurek jokatzen baitute titulua eskuratzeko kanporaketa.
Saskibaloian, azken jardunaldia jokatuko du Ibaeta Basketek, eta liga ahalik eta hoberen bukatu nahi du, bere zaleen aurrean irudi ona emanez. Ez da erraza izango, ordea, Valentzia izango baitu aurkari, ligako liderra.
Eskubaloian, Bera Berak lehen postuan bukatuko du ligako fase erregularra, eta larunbatean jokatuko du azken jardunaldia, etxean. Barakaldo jasoko dute Gaska kiroldegian (13:00), eta beste garaipen bat eskuratzen ahaleginduko dira.
PARTIDAK
Futbola
Gizonezkoen liga, 29. jardunaldia
- Athletic – Reala (larunbata, 15, 16:15).
Emakumezkoen liga, 25. jardunaldia
- Alhama – Reala (larunbata, 15, 12:00).
Belar hockeya
Emakumezkoen ohorezko maila, 15. jardunaldia
- Reala – Pozuelo (igandea, 16, 12:30).
Saskibaloia
Emakumezkoen liga, 30. jardunaldia
- Ibaeta Basket – Valentzia (larunbata, 15, 19:00).
Eskubaloia
Emakumezkoen ohorezko maila, 22. jardunaldia
- Bera Bera – Barakaldo (larunbata, 15, 13:00).
