25 dokumental ekarriko ditu Dock of the Bay jaialdiak
Dock of the Bay Musika Dokumentalen Donostiako Jaialdia maiatzaren 1etik 6ra egingo da.
Karen Carpenter musikaria. 
16. Dock of the Bay jaialdia egingo dute maiatzean, Trueba zinema aretoetan. Lehen filma Randy Martin zuzendariaren Karen Carpenter izango da. Abeslari eta bateria jotzailea hil zenetik berrogei urte igaro diren honetan, abeslariaren bizitza zoritxarrez laburraren eta haren betiereko musika-legatuaren ikuspegi berri eta harrigarria eskaintzen du dokumental gordin honek. Hurrengo egunean, hilak 2an, Alter film uruguaiarraren txanda izango da; psikologo eta abeslari frustratu gazte baten istorioa kontatzen du. Luis Miguel abeslariaren imitatzaile moduan hasten du bere ibilbidea, nolabaiteko ospea eta dirua irabazten du, beste batzuen abestiak abestuz, eta nor izan nahi duen planteatzen dio bere buruari.
Maiatzaren 3an Lee Fields: Faithful Man film amerikarrarekin hasiko dira Trueba zinema-aretoetako saioak.Funkaren eta soularen 50 urteko historia duen mitoa da Lee Fields. Dokumental honetan, soul musikaren historian bere lekua aurkitzeko egin duen bidaiak binilotik birtualera eramaten du, eta alderantziz. Jarraian, Aleksandr M. Vinogradov zuzendariaren Before We Move filmaren estreinaldia izango da. Tango Queer dantzarien historia kontatzen du filmak San Petersburgon; dantzariek gizartearen aurreiritzien aurrean dantzatzen dute, LGTBIQ+ komunitateak onarpen handiagoa lortzeko itxaropenarekin.
Maiatzaren 4an Rock Chicks – I am not female to you lan alemaniarra izango da . 50eko hamarraldiaz geroztik emakumeak agertokietara igo izana ezabatu egin da memoria kolektibotik. Sustraiak errotik ateratzeko eta historiaren beste aldea kontatzeko garaia da. Jarraian, La importancia de llamarse Ernesto y la gilipollez de llamarse Eric film espainiarra eskainiko da. Los Planetas eta Lagartija Nick musika-taldeetako bateria-jotzaile Eric Jimenezen historia kontatzen du. Azken talde horrekin, Omega disko mitikoa grabatu zuen, Enrique Morenterekin batera. Beti kili-kolo, musikaren eta erotasunaren artean, egon den gizon baten historia da.
Ostiralean, berriz, Tener Tiempo filma ikusi ahal izango dua. Errealitatearen eta fikzioaren artean, zinemaren eta metazinemaren artean, dokumental izateari uko egiten dion eta gure garaiko istorioak kontatzeko keinuak eta hitzak filmatzen dituen dokumental hau belaunaldi baten kronika ere bada; gauzak erraz ez dituen, baina hala ere borrokatu eta sortu egiten duen, eta etengabe gizartean bizitzeko eta elkarbizitzeko modu berriak asmatzen dituen belaunaldi baten kronika. Lan kolektibo itzela da filma, eta inolako etorkortasunik gabe begiratzen die, begirada ausart eta solidario batekin. Ondoren, Danny Garciaren Ghost of the Chelsea Hotel and Rock and Roll stories filmaren nazioarteko estreinaldiaz gozatzeko aukera izango da. Mundu osoan ospetsua den Chelsea hoteleko egoiliarrek eta egoiliar ohiek artista ezagunei buruzko istorioak eta beste istorio sinestezin batzuk kontatzen dituzte. Hainbat elkarrizketa jasotzen ditu filmak, hala nola Michael Imperioli Los Soprano serieko aktore eta egoiliar ohiarekin, Sherill Tippins idazlearekin, Harley Flanagan, Neon Leon, Howie Pyro eta Cynthia Ross rockeroekin, Ruby Lynn Reyner Warholen super-izarrarekin, eta Ned Van Zandt eta Victor Colicchio aktoreekin, besteak beste.
10 film labur
10 film labur eskainiko dira, horietako sei saio bateratu batean, maiatzaren 2an, asteartea, Trueban, 19:15ean.
Ilina Bathia zinema-zuzendariaren The Color Orange filmarekin hasiko da saioa; Donostian egingo da, gainera, filmaren nazioarteko estreinaldia. Zinemagile batek migratzaile den aldetik duen identitatearen eta familiako gizonekin duen harremanaren bitartez hilezkortzen du musikarekiko bere maitasuna dokumental horretan.
Foodsteps. Journey of a song Johannes Aitzetmüller zuzendariaren film laburra da, eta Italiako La Torre Delago eskalatu nahi duten Manu eta Isabelen istorioa kontatzen du. Musikaria eta konposatzailea da Manu, abeslaria Isabel. Mendiak, musika eta denborari eta arbasoei buruzko hausnarketa dira filmaren ardatza.
Nazioarteko beste estreinaldi batekin jarraituko du film laburren saioak, Lauren Luxenbergen Knucklesdokumentalarekin, hain zuzen ere. Knucks raperoaren bizitzaren biopic doku-drama laburra da, Alpha Place bere azken proiektuan inspiratutako nostalgiko bisuala.
Esna Kanta lanean (nazioarteko estreinaldia), abestiaren erraiak erakusten dituen ahots-mezu bidezko bidaia erakusten digu Arrigurik; Eñaut Elorrietak Fantasia (2022) diskorako sortutako abestia da “Esna Kanta”, sorkuntza-prozesuari buruz askotan bazter uzten duguna jasotzen duena.
Mexikoraino bidaiatuko dugu Mariano Vesparen Mío será otro cuerpo lanarekin, Andres Calamaro musikariaren testigantzan oinarritzen den istorio batekin; C.E.Feiling (1961-1997) idazle eta kritikari eszentrikoaren egungo erretratu saiakera baten zirriborro baterako gidaritzat balio duena.
Bide bazterrean Hi eta ni Kantari lanean, Mikel Laboaren ahotsean edo txori baten kantuan, Joxean Artzeren hitzak aurki ditzakegu ezinbesteko abestietan. Baina askoz lehenagotik dator Joxeanen erlazioa musikarekin eta soinuarekin; txalaparta berpiztu zuen anaiarekin batera, eta hainbat disko grabatu musika-tresna horrekin. Peru Galbete zuzendariaren lana da.
Asteartean, maiatzak 2, 21:00etan, PVC eta Aluminiozko Zatitxoak proiektatuko da, Jon Martija kazetariaren estreinako lana. Txisteei, tabakoari, ahanzturei, soinu-probei, adiskidetasunari, futbolari eta musikari buruzko road movie bat. PVC eta aluminio zatitxo batzuk, talde txiki baten historiako kapitulu bat berreskuratzen dutenak: The Window Ventanas taldearenak, hain zuzen ere, eta 1993an Suitzan egin zuten birarenak.
Asteazkenean, Amanda Louise Macchia zuzendariaren Baccara. A certain Song: Yes Sir, I can Boogie filmaren nazioarteko estreinaldia proiektatuko da. Bacara bikotearen Yes Sir, I Can Boogie abesti disko arrakastatsuaren historia, Mayte Mateosek kontatuta. Historia bat, non dantzarako kantak sortzeko, musika eta moda nahasten diren.
Eta ostiralean, hilak 5, proiektatuko dira lehiaketara aurkezten diren azkeneko bi film laburrak. The Dreams in just in my Mind eta Odd Songs, hain justu. The Dream Is Just In My Mind filmak Bakailoaren Ibilbide mitiko hura (Ruta del Bakalao) bertatik bertara bizi izan zituztenen lekukotzetan sakontzen du, Youtubeko iruzkin formatuan. Odd Songs lanak, berriz, Mark Cunninghamen ibilbidea laburbiltzen du, New Yorkeko 70eko hamarraldiko No Wave alditik olinpiar jokoen aurreko Bartzelonako underground aldira arte.Nazioarteko beste estreinaldi batekin jarraituko du film laburren saioak, Lauren Luxenbergen Knuckles dokumentalarekin, hain zuzen ere. Knucks raperoaren bizitzaren biopic doku-drama laburra da, Alpha Place bere azken proiektuan inspiratutako nostalgiko bisuala.
Nazioarteko musika dokumentalik nabarmenenen aukeraketa bat
Urtero bezala, nazioarteko musika dokumentalik nabarmenenen aukeraketa bat egiten du jaialdiak, eta Donostian oraindik ikusi ezin izan diren sei film luze proiektatuko dira aurten. Asteazkenean, maiatzak 3, Alejandro G. Salgadoren Un Día Lobo López proiektatuko da. Kiko Venenok musikatik bizimodua ateratzeko azkeneko aukera ematen dio bere buruari Expo92 nazioarteko erakusketaren aurreko urteetan. Film hau testuinguru horretan Echate un cantecito diskoa sortzeko prozesua osatu zuten pertsonen eta espazioen erretratua da.
Hurrengo egunean, hilak 4, osteguna, Elephant 6 Recording Co. Screening filmaren txanda izango da. 90ko hamarraldiko rock psikodeliko taldeen soinuen sorkuntza-bilakaera erakusten duen filma; hor daude, esaterako, Elephant 6 kolektiboa sortu zuten taldeetako batzuk, hala nola Olivia Tremor Control, Neutral Milk Hotel eta Apples in Stereo.
Ostiralean, bestalde, Music for Black Pigeons filma ikusteko aukera izango dugu, inprobisazio zinematografikoko pieza bat erakusten digun film luzea. Kontua da orainean bertan egotea, musika jotzea eta inprobisatzea, jazzaren aitzindarien belaunaldien legatuarekin jarraitzea, eta aurrez entzundako ezeren antzik ez duen zerbait sortzea.
Maiatzaren 6an, larunbata, Sahatsa Jauregik zuzendutako Verde Prato lanaren nazioarteko estreinaldia izango da Antzoki Zaharrean. Ana Arsuagarekin (Verde Prato) elkartzeko abagunea da, eta elkartzea eta elkarrekin egotea oso beharrezkotzat sentitzen zen une batean lagunekin ospatzeko performance bat sortzea ere.
Jarraian, James Taylorren A Film About Studio Electrophonique dokumentala ikusteko aukera egongo da. Etxe bateko beheko solairuan, Sheffielden soinuak grabatu zituen Kenek, 1980 eta 1990 hamarraldietako super-izarren belaunaldi oso bat elikatuz: ABC, The Human League, Heaven 17, Clock DVA eta Pulp. Horrela sortu zuen Studio Electrophonique.
Eta jaialdia itxiko duen galaren ondoren, The Zombies. Hung Up on a Dream film amerikarra proiektatuko da Antzoki Zaharreko pantailan. The Zombies taldeko kideek haien historia kontatzen dute, baita Odessey and Oracle inoizko itzal handieneko albumetako bat nola egin zuten ere. She’s Not There izan zen, Beatles-en atzetik, britainiar talderik ezagunena izatera eraman zituen hit-a.
