'Bizitza jokoan' erakusketa eta joko digitala, Okendo Kultur Etxean
Mugarik Gabe elkartearen Bizitza jokoan kanpainak agerian utzi nahi du giza eskubideen eta ingurumen eskubideen –edo naturaren eskubideen– defendatzaileek eta kolektiboek aurrez aurre duten jazarpen eta zaurgarritasun egoera. “Paradoxikoa dirudien arren, era guztietako erakundeek eta enpresek krisi klimatikoaren aurrean jardutea beharrezkoa dela onartzen duten une honetan, lurra, lurraldea eta natura defendatzen duten pertsonak jazarriak, kriminalizatuak eta, kasurik txarrenean, erailak izaten jarraitzen dute”.
Horri buruzko erakusketa ikusi ahal izango da maiatzaren 2tik 13ra bitartean Groseko Okendo Kultur Etxean. Erakusketaren datuak Mugarik Gabek egindako ikerketa batetik ateratakoak dira eta Latinoamerikako lau kasu erakusten ditu: Paraguaiko soja itsasoa eta bizitzarako itoak, Kolonbiako bizitza belzten duen ikatza, Guatemalako uraren pribatizazioa eta Hondurasko banana errepublikatik erauzketarako bidea. Ilustrazioen egilea Zoiartze Puente da, ikerketatik ateratako hainbat esaldi eta datu iruditan erretratatu dituen artista gaztea.
Erakusketak kubo eta tamaina desberdinetako panelekin osatutako bederatzi egitura ditu. Gainera gai berdinei buruzko galderen eta erantzunen joko digital batekin dator, erakusketa ikusten duten pertsonek QR kode baten bidez jokatu dezaketena.
