"Hemen badugu Etxebizitza Lege bat, eta baditu erremintak etxebizitzaren arazoari aurre egiteko"
Eneko Goia alkateak Espainiako Gobernuaren Etxebizitza Lege zirriborroari buruzko iritzia eman du, nahiz eta aitortu duen ez duela testua "zehatz-mehatz" ezagutzen.
Eneko Goia alkatea, Tokiko Gobernu Batzordearen osteko prentsaurrekoan. (Argazkia: Donostiako Udala) 
Askotariko iritziak sortu ditu Espainiako Gobernuaren Etxebizitza Legearen tramitazioak. Batez ere, PSOEren eta Unidas Podemosen gobernuak ERC eta EH Bildu alderdiekin adostu duelako legearen zirriborroa. EAJ lege horren kontra agertu da, besteak beste, Eusko Jaurlaritzaren eskumenak urratuko dituelakoan.
Eneko Goia Donostiako alkate jeltzaleari gaiaz galdegin diote gaur goizean, Tokiko Gobernu Batzorde osteko prentsaurrekoan. “Ez dut testua zehatz-mehatz ezagutzen. Halere komeni da argi uztea zirriborro bat dela, ez da legea”, esan du Goiak. “Argitaratu diren ezaugarri batzuk ezagutzen ditut, eta, beraz, ez da erraza balorazio bat egitea. Beraz, tentuz jokatu nahi dut”, gaineratu du.
Horrela ere, Espainiako Etxebizitza Lege zirriborroaren inguruko balorazioa eskaini du. “Donostiako Udalaren kezketako bat da etxebizitzarena. Lege honekin hobetzea bada helburua, ez da txarra. Halere, ikusi behar da zein ezaugarri dituen eta noraino den eraginkorra”, azaldu du alkateak. Eskumenei dagokienez, ondorengoa adierazi du: “Ez naiz eskumenen gaian erabat sartuko, baina, noski, errespetatu egin behar dira. Eusko Jaurlaritzak bereak ditu”.
EAEko Etxebizitza Legea
2015ean Eusko Legebiltzarrak EAEko Etxebizitza Legea onartu zuen PSE-EEren, EH Bilduren eta UPDren aldeko botoekin. Orduan, EAJk eta PPk kontra bozkatu zuten. Horrela ere, EAJk gaur egun aintzat hartzen du 2015ean onarturiko legea. Baita Eneko Goiak ere: “Hemen badugu Etxebizitza Lege bat, eta baditu erremintak etxebizitzaren arazoari aurre egiteko”.
Bestalde, lege zirriborroak proposatzen dituen nobedadeetako batzuk dagoeneko EAEn indarrean daudela gogoratu du Goiak. “Duela zortzi urte gurean onartu zen etxebizitza publikoen promozio berrietan, Babes Ofizialeko etxebizitzak %40 izatea. Horrekin batera, nabarmendu behar da EAE punta-puntan dagoela etxebizitza publikoari dagokionez”, azaldu du alkateak.
Alokairuaren prezioa
2020an Espainiako Gobernuaren esku utzi zuen Goiak alokairuei muga ezartzeko ardura. Hiru urte beranduago, eta Espainiako Gobernuak alokairuen prezioa mugatzeko asmoa agertu duenean, alkateak esan du ez dela “gai erraza”. Alokairuei muga jartzeko asmoa 2025erako aurreikusten dela gaineratu du, eta tentsio handiko guneen inguruan “literatura” asko dagoela.
“Esperientzia desberdinak daude, eta Berlingo adibidea jarriko dut. Alokairuen prezioa ez zen igo mugatu zuten zonetan, baina horrek ekarri zuen inguruko eremuetan igotzea. Helburua ez zuten lortu. Gauza bat da desio batzuk izatea, eta jabeek euren etxeak merkaturatzea. Ordea, albo-kalteak daude eta ondo aztertu behar dira”, azaldu du Goiak.
