Pedro Sanchezen gobernuak "Donostiaren alde egindako apustua" goraipatu du Marisol Garmendiak
PSE-EEren lau hautagai, Loiolako Erriberako Trukagailuari buruzko prentsaurrekoan. Ezker-eskuin: Ane Oiarbide, Marisol Garmendia, Iñaki Gabarain eta Cristina Lage. (Argazkia: PSE-EE Donostia) 
Marisol Garmendia PSE-EEko alkategaiak eta Ane Oiarbide, Iñaki Gabarain eta Cristina Lage hautagaiek agerraldia egin dute astearte goizean Loiolako Erriberan, topoa (Euskotren) eta trena (Renfe) lotuko dituen trukagailuari buruz hitz egiteko. Izan ere, Espainiako Gobernuko Ministroen Kontseiluak onartu egin du Loiolako Erriberako trukagailua eraikitzeko hitzarmena eta finantziazioa. Hala ere, hitzarmena ez da gauza berria, iazko abuztuan sinatu baitzuten. Alkategaiak gogorarazi du 35,9 milioi euroko inbertsio publikoa suposatuko duela proiektuak, eta Espainiako Gobernuak (Adifen bidez), Eusko Jaurlaritzak (ETS-ren bidez) eta Gipuzkoako Foru Aldundiak finantzatuko dutela, bakoitzak heren bat jarrita.
Horrela, Garmendiak aprobetxatu du Pedro Sanchezen gobernua goraipatzeko: “Gobernu sozialistek beti egin dute Donostiaren garapenaren alde. Pedro Sanchezen gobernuak Loiolako kuartelei buruzko akordio historikoarekin egin du eta orain berriro ere egin du Loiolako Erriberako trukagailuarekin, aurreko gobernu sozialistek Zurriolako hondartza eta Talent House egia bihurtu duten bezala. Gainera, laster gobernuak Pio XII.aren plazan duen ordezkariordetzaren inguruan berri onak izango ditugulakoan nago. Sozialistak gobernuetan dauden bakoitzean, gure hiriak aurrera egiten du”.
“Gobernu sozialistekin, garraio publikoa aurrera doa eta hobetu egiten da, herritarrei mesede eginez. Hor daude Mugi txartelaren inguruko akordioak, Renfe ere integratu duena, bai eta garraio publikoaren %50eko hobaria ere, eta lorpen hori Donostian lortu genuen, nahiz eta EAJ aurka egon”, gaineratu du Garmendiak.
