Ttanttaka antzerki taldea eta Pascal Gaigne musikaria saritu dituzte Espainiako Max sarietan
Telmo Irureta eta Aitziber Garmendia aktoreak 'Sexberdinak' obraren eszena batean. 
Espainiako Max arte eszenikoetako sariak banatu dituzte bart Cadizen, eta bi sari Donostiara joan dira. Tanttaka konpainiak produkzio lan onenaren saria jaso du, Mireia Gabilondok zuzendutako Sexberdinak obragatik. Kepa Errastik eta Telmo Iruretak idatzitako obra horrek emakume gazte baten eta garun paralisia duen pertsona baten arteko harreman sexu-afektiboa jorratzen du, eta Irureta bera du protagonista, Aitziber Garmendiarekin batera.
Pascal Gaignek, berriz, musika konposizio onenaren saria irabazi du Kukai konpainiaren Eta orain zer? dantza ikuskizunean egindako lanagatik. Joan den urteko Donostiako Musika Hamabostaldian estreinatu zuten obra, eta beste bi Max sari eskuratzeko hautagaia zen, dantza ikuskizun onenarena eta argiztapen diseinu onenarena, baina bi horiek ez ditu lortu. Euskal zinemako hainbat pelikulatako musika konposatu du Gaignek.
