Kopa dute jokoan
Bera Beraren partida bat. 
Bera Berak bikain bukatu du ligako fase erregularra; lehen postuan, eta bederatzi puntuko aldea aterata bigarrenari. Ordea, atseden handirik hartzeko denborarik ez dute izango donostiarrek, gaur (hilak 21) jokatuko baitute kopako final-laurdenetako kanporaketa, Malagan, Elxen aurka. Ligan erakutsitako maila ona erakutsi nahi dute kopan ere, eta, Elxi irabaziz gero, larunbatean jokatuko dituzte finalerdiak, Xixonen edo Atletico Guardesen aurka (21:00). Finala igandean izango da (19:00), eta lau talde hauek daude koadroaren beste aldean: Granollers, Errioxa, Malaga eta Kanaria Handia. Ligako titulua eskuratzeko kanporaketa, aldiz, hilaren bukaeran jokatuko dute.
Futbolean, Realeko neskek Valentziaren aurka jokatuko dute larunbatean etxean, eta behingoz hiru puntu batzea du helburu Natalia Arroyoren taldeak, azken bi neurketetan, ondo jokatuta ere, berdinketak baino ez baitituzte lortu. Aurkari zuzena da Valentzia, zortzigarren sailkatua baita, eta Reala bederatzigarrena da.
Realeko mutilei dagokienez, derbia galdu eta gero, irabazteko gogoz iritsiko dira Anoetara larunbatean, garaipenaren bidea berrartzeko. Txuri-urdinek Rayo Vallecano izango dute aurkari, ligako zortzigarrena. Reala laugarrena da, baina lehenengo itzulian erakutsitako maila onari esker ari da mantentzen postu hori; horregatik, ligako azken txanpan ere maila ona erakutsi nahi du Imanol Alguacilen taldeak.
Belar hockeyan, Realak joan den asteko garaipenaren bidetik jarraitu nahi du, igandean Terrassaren etxean irabazita. Ligako titulua eskuratzeko kanporaketa jokatzeko postuak oso urruti ditu, beraz, denboraldia ahalik eta goren amaitzea du helburu Ivan Lorenteren taldeak. Terrassa ligako azken postuetan dago, eta, beraz, puntuak batzeko aukera ona da Realarentzat.
PARTIDAK
Eskubaloia
Emakumezkoen kopa, final-laurdenak
- Bera Bera – Elx (ostirala, 21, 18:00).
Futbola
Emakumezkoen liga, 26. jardunaldia
- Reala – Valentzia (larunbata, 22, 11:30).
Gizonezkoen liga, 30. jardunaldia
- Reala – Rayo Vallecano (larunbata, 22, 18:30).
Belar hockeya
Emakumezkoen ohorezko maila, 16. jardunaldia
- Terrassa – Reala (igandea, 23, 12:30).
