Abian da Igeldoko jaietako argazki lehiaketa
Igeldoko jaietako Umore Horia lehiaketako probetako bat, 2022an: Bolajalea. (Argazkia: Beñat Parra) 
Igeldoko San Pedro jaiak uztailaren hasieran izango dira, baina Ttonttorro jai batzordekoak prestaketa lanekin dabiltza dagoeneko. Hain zuzen ere, jaietako egitarauaren azalean jartzeko argazkia aukeratzeko lehiaketa abiatu zuten maiatzaren hasieran.
Igeldorekin zerikusia duen argazki, marrazki, muntaketa edo collage bat aurkeztu daiteke, 14,85 x 21 zentimetroko tamainakoa. Lanak aurkezteko epea ostiral honetan (hilak 19) itxiko dute, eta bide hauetatik egin daitezke entregak: ttonttorro@gmail.com helbidera formatu digitalean bidalita, Itsas Arrue Kultur Etxera (Igeldoko plaza, 4, 20008) postaz bidalita, kultur etxeko buzoian utzita edo kultur etxeko bulegoan entregatuta. Lan irabazlea egitarauko azalean agertuko da eta egileak 100 euroko saria irabaziko du.
