(Argazkia: Malen Aldalur) Ba Gera merkatarien elkarteak adierazi du ekainaren 23an, 24an eta 25ean belodromoan egingo den Flash Market Outlet azokaren aurka dagoela, eta udalari ekitaldi hori “bertan behera” uzteko eskatu dio. “Donostiako saltoki txikien elkarte gisa, udalari jakinarazi diogu sektorea kezkatuta dagoela aukera horren aurrean, eta azoka berehala bertan behera uzteko eskatu diogu, uste baitugu kolpe latza dela une honetan hain ahulduta dagoen Donostiako merkataritzarentzat”, azaldu du Ba Gerak bere webgunearen bidez zabaldu duen mezu batean.
Ba Gerak uste du ekitaldi hori “gertuko merkataritzaren interesen aurkakoa” dela, eta “kalte larriak eta konponezinak” eragingo lizkiokeela gertuko merkataritzari, saldu nahi diren artikuluak ez direlako Donostiako merkatarien produktuak. “Oso negozio eredu eztabaidagarria da, ez baitator bat stock azoken funtsarekin, horien azken helburua saltoki txikiei stocka likidatzen laguntzea baita”, azaldu du Ba Gerak.
Ordea, kasu honetan ekitaldia antolatzen duen erakundea enpresa nazional bat dela adierazi du, eta ekitaldi horiek “bere onurarako” antolatzen eta merkaturatzen dituela, eta ez saltoki txikien sektorearentzat. Gainera, azoka hori egiteko aukeratu diren datak Donostiako saltoki txikientzat “bereziki kaltegarriak” direla azaldu dute, merkealdia hasi aurreko asteburuarekin bat baitator. “Data horiek bereziki garrantzitsuak dira moda merkataritzaren sektorearentzat, eta ekitaldi horrek eragina ken liezaioke”, salatu dute.
Donostian ez litzateke izango azoka hori bertan behera uzten duen lehen hiria, izan ere, aurten, A Coruñako eta Vigoko (Galizia, Espainia) udalek bertan behera utzi dute ekitaldi hori maiatzean egiteko baimena (A Coruña: 2023ko maiatzaren 12, 13 eta 14an/Vigo: 2023ko maiatzaren 05, 06 eta 07an), merkataritza txikiari kalte egiten diotela iritzita. Era berean, aurreko urteetan baimena bertan behera utzi zen Logroñon eta Gasteizen ere.
