Finalerdietara pasatzeko garaipen batera dago Gipuzkoa Basket
Coruñaren eta Gipuzkoa Basketen arteko partidetako bat. (Argazkia: Gipuzkoa Basket) 
Gipuzkoa Basketek ACB ligan jokatu nahi du hurrengo denboraldian. Argi gelditu da hori asteburuan, ACB ligara igotzeko kanporaketako final-laurdenetako lehenengo bi partidak irabazi baitizkio Coruñari. Larunbatean jokatutakoa 67-77 irabazi zuten donostiarrek, eta igandean jokatutakoa 62-71. Bost partidatik hiru irabazten dituena pasatuko da finalerdietara, eta ostiralean jokatuko dute hirugarren neurketa, Donostian; asteburuko maila bera erakusten badute, 0-3koa lortuta pasatu daitezke hurrengo fasera.
Futbolean, Realak galdu egin zuen igandean Atletico Madrilen etxean, baina gutxi zaie porrot hori txuri-urdinei, matematikoki Txapeldunen Ligara sailkatu baita klub donostiarra. Izan ere, Vila-realek Rayoren zelaian galdu zuen, eta, horri esker, helburua bete du Realak. Klubaren historian bosgarren aldiz sailkatu dira Txapeldunen Ligara, eta aurreko aldia duela hamar urte izan zen, 2013-2014ko denboraldian; ligako azken jardunaldia Anoetan jokatuko dute, eta festa bat izatea espero da. Atletico Madrilen aurkako neurketako golei dagokienez, Alexander Sorlothek egin zuen Realaren gola, eta Antoine Griezmann txuri-urdin ohiak eta Nahuel Molinak egin zituzten etxekoenak.
Azkenik, belar hockeyan, Realak 3-2 irabazi zion Tenisi igandean, 0-2ko kontrako markagailuari buelta emanda. Milagros Fernandezek sartu zituen Tenisen bi golak, baina txuri-urdinek erreakzionatu egin zuten, eta partidari buelta eman zioten, Ruggieriren bi goli eta Darnayren gol bati esker. Txuri-urdinek ez dute ezer jokoan, baina liga ahalik eta hoberen bukatzea dute helburu; Sardineroren aurka jokatuko dute azken partida, asteburu honetan. Bestalde, Tenisen aurkako partidan jokalari eta zale txuri-urdinek agur esan zieten Maider Altunari eta Ane Erguini; hamaika eta bost urte eman dituzte klubean hurrenez hurren, eta erretiroa hartuko dute denboraldia bukatzean.
EMAITZAK
Saskibaloia
ACB ligara igotzeko kanporaketak (final-laurdenak)
- Coruña 67 – Gipuzkoa Basket 77
- Coruña 62 – Gipuzkoa Basket 71
Futbola
Gizonezkoen liga, 37. jardunaldia
- Atletico Madril 2 – Reala 1
Belar hockeya
Emakumezkoen ohorezko maila, 21. jardunaldia
- Reala 3 – Tenis 2
