Ingurumen baimena jaso du Belartzako logistika zentroaren proiektuak
Donostiako Udalbatzak behin betiko onarpena eman ahal izango dio udal gobernu berria osatu osteko osoko bilkuran.
Belartza Goikoa eremuan egindako isurketa ilegala. (Argazkia: Haritzalde) 
Añorgako Belartza Goikoa eremuan logistika zentro handi bat jartzeko proiektuak beste urrats bat egin du. Eusko Jaurlaritzak ingurumen baimena eman dio proiektuari, eta Donostiako Udalbatzak behin betiko onarpena eman ahal izango dio hurrengo osoko bilkuran. Horretarako, udal gobernu berria osatu behar da lehendabizi.
Gogora dezagun, 2016an isurketa ilegal bat baimendu zen lursailean eraikiko dutela aipaturiko logistika zentroa. EAEko Auzitegi Nagusiak 2019an Valeriano Urrutikoetxea (VUSA) enpresa eta lursailen jabea eta Donostiako Udala zigortu zituen. Bata, harri betelan ilegala egiteagatik, eta, bestea, isurketa hori baimentzeagatik. Haritzalde Naturzaleen Elkarteak eta Belartza 2 Gelditu plataformak gogor egin zuten harri betelanaren kontra, eta justiziak arrazoia eman zien arren, VUSAk aurrera eraman ahal izango du bere asmoa. Horretarako, udalaren laguntza izan duela salatu du hainbatetan Haritzaldek.
Belartzan logistika zentroa baimentzeko, baldintza batzuk ezarri ditu Jaurlaritzak. Ordea, baldintza horiek kritikatu ditu Haritzaldek, ez direlako “batere” zorrotzak: “Euskal Autonomia Erkidegoa da hirigintza plan guztiek ingurumen baimena jasotzen duten lurralde bakarrenetakoa. Bakar batek ere ez du inolako trabarik, eta denek errespetatzen omen dute ingurugiroa”.
Baso misto bat
Añorgako berdegunean logistika zentro bat eraikitzeko, ondorengo “konpentsazio neurria” ezarri dio Donostiako Udalari Jaurlaritzak: hamar hektareako baso misto bat landatzea. Ordea, ez du zertan Añorgan bertan izan behar, hiriko beste edozein tokitan izan daiteke. Landaketa hori degradatutako edo ingurumen kalitate gutxiko eremuren batean egin beharko du udalak.
