Laura Westerik fitxatu du Ibaeta Basketek
Laura Westerik jokalaria (kamiseta laranjarekin), partida batean. 
Laura Westerik (Nimega, Herbehereak, 1998) hegaleko jokalariak Ibaeta Basketen kamiseta jokatuko du 2023-2024ko denboraldian, klub donostiarrak iragarri duenez.
1,76 neurtzen du Westerikek, eta Bembibren jokatu du azken denboraldian, Ibaeta Basketen liga berean. 30 neurketa jokatu ditu denboraldian, eta, batez beste, 6,5 puntu sartu ditu partida bakoitzeko, bi errebote hartu ditu, zelaiko jaurtiketen %38 sartu ditu, hirukoen %34,5 eta jaurtiketa libreen %73,3.
Zortzi fitxaketa egin ditu dagoeneko klub donostiarrak, Westeriken aurretik Dulcy Fankam, Gracia Alonso de Armiño, Jewel Tunstull, Becky Massey, Erin Whalen, Alba Prieto eta Lara Gonzalez fitxatu baititu. Bestalde, Yurena Diaz eta Maria España kapitainen kontratuak berritu ditu. Izan ere, hainbat baja izan ditu taldeak hurrengo denboraldirako: Mariam Coulibaly, Joy Adams, Cristina Soriano, Alima Dembele, Nicole Cardaño, Natalia Rodriguez, Claudia Cuic eta Paula Estebas.
