ZIUtik atera da Ion Aranburu
Ion Aranbururen egoera salatzeko eta senide eta lagunei babesa adierazteko elkarretaratzeko kartela, Antiguan. (Argazkia: Joseba Parron San Sebastian) 
Ion Aranburu, koman zegoen Realeko zalea, Zaintza Intentsiboko Unitatetik (ZIU) atera da. Atzo bertan senideek egoera hobera zihoala baieztatzen zuen mezua zabaldu zuten, eta gaur, albistea baieztatu dute.
Aranbururen senideek hedabide honi baieztatu diotenez, elkarrizketa normalak edukitzeko gai da Aranburu, nahiz eta ez duen gertatutakoaz ezer oroitzen.
Maiatzaren 27an gertatu zen erasoa Sorian (Espainia), eta Aranburu hainbat astez egon da koman, Burgosko ospitalean. Joan den astean, aldiz, komatik atera zen, eta Donostia Ospitaleko ZIUan egon da: “Komatik atera izateaz gain, poliki-poliki, pauso garrantzitsuak ematen ari da, ondo ari da eboluzionatzen, aurrerantzean bide luzea eta gogorra geratzen zaion arren. Ziur gaude, etorkizunean ere, lehen bezala, futbolaz gozatuko duela bere semeekin eta lagunekin, Anoetan, Sorian edo beste edonon”, azaldu dute senideek eta lagunek.
Donostiako Udalak erasoa gaitzetsi zuen joan den astean –PPren kontrako botoarekin–, baina Realak ez du adierazpen ofizialik egin oraindik. Senide eta lagunek justizia eskatzen dute, izan ere, oraindik ez dute erasotzailerik atxilotu.
