Auzo elkartetik lanean jarraitzeko asmoa dute
Loiola da azkenaldian aldaketa nabarmenak jasaten ari den auzoetako bat, batzuk besteak baino agerikoagoak. Bertako auzo elkartea gertutik ari da prozesu hori jarraitzen, nahiz eta elkartea bera den aldaketa jasan duen horietako bat: egungo taldea 2018tik dabil lanean.
Ezker-eskuin: Josemi Aierbe, Estitxu Artano eta Patxi Lago ‘Titin’, auzo elkarteko kideak. (Argazkia: Loiolako auzo elkartea) Zeharbidearen bulebarizazioa, Astiñeneko zubia, TAO zerbitzua ezartzea… Loiola eraldaketa betean dago azken urteotan. Egin diren eta egiteke dauden proiektuen aurrean, auzo elkartetik bizilagunen beharrak asetzen dihardute. Ez alferrik, eraldaketa betean egon den auzo elkarte batez ari gara. Josemi Aierbe da oraingo elkarteko kideetako bat: “Gure aurreko auzo elkarteak urte asko pasatu zituen, haiek uztean lagun bati eskaini zioten jarraitzea, eta lagun horrek niri”. Puska batean, bion artean kudeatu zuten elkartea, baina lan kontuengatik lagunak kanpora joan behar izan zuen bizitzera, eta orduan sartu ziren egungo beste kideak. Horietako bat da Patxi Lago Titin: “Josemik bultzatu gintuen auzo elkartean sartzera. Orain, bospasei pertsona elkartzen gara”. Oraingo lantaldea “auzoko saltseroek” osatzen dute, Aierberen arabera. Hilabetean behin elkartzen dira, baina “presazko” zerbait gertatuz gero, elkarren artean hitz egin eta batzen dira.
Ildo horretatik, oinarrizko lantaldea bospasei pertsonakoa bada ere, bileretan jorratzen dituzten gaien arabera kide kopurua hazi egiten dela aipatu du Lagok. Izan ere, Loiolako erdigunea behean dago, baina auzoak badauzka beste zona batzuk ere, “eta bakoitzak bere arazoak ditu”, Lagoren esanetan. Auzo elkartearen lana da aldarrikapen horiek guztiak batu eta udalari helaraztea. Hain zuzen ere, hori da, Lagoren arabera betiere, auzo elkarte baten egitekoa: “Auzoaren bozgorailua izan udalarekiko, eta udaletik jakinaren gainean egon daitezela hemen gertatzen denaz”.
Orain arteko aldaketekin pozik
Auzoak izan duen bilakaera “nahiko positiboa” izan dela dio Lagok, baina zehaztu du “presioari eta lanean egon diren elkarteei esker” izan dela posible: “Gu loiolatarrak gara jaiotzez, eta lehen auzoa zenetik eta zuen famatik orain dena ikustera, aldea dago”. Aierbek ere begi onez ikusten ditu egindako aldaketak, baina kexu da aldaketen erritmoez: “Auzoan obrak faraonikoak bihurtzen dira. Hori da sentsazioa: egiten direla, baina oso poliki”.
Aldaketa horiek auzoari “bizia emateko eta jende gaztea bertara erakartzeko” balio izan dute, Lagoren hitzetan. Dena den, gauza bat eskatu du: “Guk nahi duguna da etxean bizi garenak izatea etxea egiten dugunak, elkartearekin eta auzoko jendearekin”.
Zentzu horretan, berriki ezarri den TAO zerbitzua aipatu du Lagok: “Loiolan aparkatzeko arazoa zegoela ikusten genuen”. Zeharbidea kentzearekin batera, 100 aparkaleku kendu ziren. Lanek iraun bitartean, GI-20 saihesbideko zubiaren azpian dauden lekuen erdiak auzoko jendearentzat erreserbatzea lortu zuten. Lanak bukatu bezain pronto, ordea, baimen hori bertan behera geratu zen. “Ikerketa bat egin genuen, eta ikerketa hori oinarri hartuta proposatu genuen TAO zerbitzua ezartzea”, kontatu du Lagok. Aldaketa horrekin “pozik” nabaritu dute jendea Aierbek eta Lagok, eta biek ere ikusten dute orain aparkatzeko lekua egon badagoela.
Hala ere, Lagok zalantzak ditu hori izango ote den aparkatzeko arazoaren konponbidea: “Orain ikusi beharko dugu nola funtzionatzen duen TAO zerbitzuak”. Izan ere, Lorategi Hiria eraikitzen bukatzean 400 aparkaleku inguru desagertzea aurreikusten dela dio Lagok: “Kultur etxe parekoa, Ur Kirolakerainokoa eta GI-20 saihesbideko zubiaren azpian dauden lekuen erdiak desagertuko dira”. Beste datu bat ere gehitu du: “Berriki martxan jarri duten TAO zerbitzuan 800 bat aparkalekutarako plana diseinatu baldin badute, horrek esan nahi du lekuen %40-45 kenduko dizkigutela”. Lagoren aburuz, konponbidea 150 plaza inguru izango lituzkeen parkinga izan beharko litzateke, eta kokalekuak ere zehaztu ditu: “Guk dagoeneko udalari eskatu diogu lur azpiko parking bat egiteko kultur etxearen eta Ur Kirolaken artean, edo Lorategi Hirian egingo den proiektuan, lur azpian beste bi pisu gehiago eraikitzea. Beste aukera bat altueran egitea izango litzateke, La Salle parean dagoen aparkaleku horri beste bizpahiru pisu gehituta”.
Osasun etxea eta kuartelak
Aparkatzeko arazoa ez ezik, auzo elkarteak baditu presio egiten jarraitzeko beste aldarrikapen batzuk ere. Une honetan behar handiena osasun etxeari dagokio, Lagoren arabera: “Donostia hegoaldeko zona hau, Txomiñeneko anbulatorioari dagokiona, asko hazi da, eta anbulatorio berria behar da”. Horri lotuta, maiatzean alkateak Txomiñenen egiten ari diren azken eraikinaren etxabea horretarako gorde dutela aipatu ziola dio Lagok, baina hori da dakiten bakarra: “Lekua behintzat badutela esan ziguten. Horrelako gauzek luze jotzen dute, baina herritarrek presioa egiten egon behar dugu”. Izan ere, osasun etxearena atzeratzen ari den lan horietako bat bihurtu dela dio Aierbek: “Txomiñenea auzo berria egiten hasi zirenean esan ziguten lur eremu bat gordeko zela horretarako, baina auzoa egin da eta ez dute anbulatoriorik egin. Beti luzapenak ematen, eta horrek asko erretzen du”.
Kuartelei dagozkienak ere lantzen ari dira. Bertan 1.700 etxebizitza aurreikusten dira, eta horrek auzoaren egungo biztanleria bikoiztu dezake egun 5.000 biztanle inguru ditu Loiolak. Horrelako proiektu baten aurrean auzo elkartearen eta gainerako elkarte eta eragileen parte hartzea sustatu beharko litzatekeela nabarmentzen du Lagok: “Denok egiten dugu auzo hau, eta denok dugu zeresana. Dena ez dadila erabakita etorri, eta dabilenari kasu egin”. Dena den, Aierbe ez da oso optimista proiektu horri dagokionez: “Madrilen gobernu aldaketa baldin badago, auskalo zer gerta daitekeen kuartelekin, eta gobernu honek jarraituko balu ere ez dakit”. Ildo beretik mintzo da Lago ere: “Hori hauteskundeen aurretik sinatu behar zen. Udalak dena antolatua dauka, dirua ere gordea du, baina ez dago ezer sinatuta”.
