Abordatzean izena emateko epea zabalik da
2022ko abordatzea. (Argazkia: Beñat Parra) 
Bi aste baino gutxiago gelditzen dira Aste Nagusia hasteko, eta Donostiako Piratek euren jarduera arrakastatsuenean, abordatzean, parte hartzeko izen emate epea ireki dute dagoeneko. Hilaren 14an izango da abordatzea, eta, ohiko legez, ehunka lagunek Donostia abordatuko dute.
Izena emateko epea gaur (hilak 1) ireki dute, eta Instagram sare sozialean argitaratu duten bideo batean azaldu dute nola eman daitekeen izena. Donostiakopiratak.eus webgunean sartu behar da, abordatzearen atalean klik egin, eta izena emateko prestatu duten galdetegia bete. Hori egin ondoren, izena eman dutenek mezu bat jasoko dute, parte hartzeko arauekin eta irizpideekin, eta baltsa muntatzeko zein txanda egokitu zaien ere jakinaraziko diete.
Ziur pirata asko eta asko abordatzerako gogoz egongo zaretela dagoeneko. Bada, oraindik ia bi aste itxaron beharko dituzue, baina bitartean iazko abordatzeko bideoa eta argazkiak ikus ditzakezue, 2022an bizitakoak gogoratzeko.
