Auto bat Urumeara erori da bart Martutene inguruan
Autoa Urumea ibaira erori den tokia. (Argazkia: Beñat Parra) 
Auto bat Urumea ibaira erori da bart, Martuteneko Lugañene zubiaren inguruan. Udaleko iturriek azaldu dutenez, Udaltzaingoak 01:18ean izan du istripuaren berri, jaso duen dei baten bidez.
Hiru pertsona zeuden autoan, bi gizon (29 eta 23 urtekoak) eta 18 urteko emakume bat. Hirurak euren kabuz atera ahal izan dira autotik, eta gizon bat eta emakumea ospitalera eraman dituzte, zauri arinekin. Suhiltzaileak bertaratu direnerako, hiru pertsonak Donostia Arraun Lagunaken ontziralekuan zeuden.
Autoa Urumea ibaira erori den tokia. (Argazkia: Beñat Parra)
27 industrialdeko biribilgunea pasata, autoak Lugañeneko zubia hartu du, baina galtzadatik atera eta ibaira erori da. Udaleko iturrien arabera, hipotesi nagusia da abiadura azkarregian zihoala autoa, eta horregatik atera dela errepidetik.
