Irisgarritasuna hobetzeko lanak egingo dituzte Martutene eta Loiolako tren geltokietan
Martuteneko tren geltokia, Barkaiztegin. Inaxio Esnaola 
Adifek 8,4 milioi euroko inbertsioa egingo du Martuteneko eta Loiolako geltokietako irisgarritasuna hobetzeko. Bi geltokiak (Brinkola-Irun) aldirietako C-1 lineako geltokiak dira. Arduradunek azaldu dutenez,inbertsio bateratuarekin lizitatu diren lanek “bidaiarien mugikortasuna eta irisgarritasuna” hobetzea dute helburu.
Donostiako Loiola geltokian, egungo eraikina eraitsi eta tamaina handiagoko eraikin berri bat eraikitzea aurreikusten da, sarbideen kontrola, instalazioen gelak, itxaroteko lekua eta markesina barne. Horrez gain, estazioaren sarbidean dagoen malda txikia arrapala batekin konponduko dute eta argiztapen instalazioak hobetuko dituzte. Era berean, egungo azpiko pasabide itxi eta goiko pasabide bat eraikiko dute eskailerak eta igogailuarekin, trenbidearen bi aldeak lotzeko.
Martutenen, berriz, goiko pasabide bat eraikiko da igogailuekin eta eskailerekin, nasen arteko pasabidea errazteko. Proiektuaren arabera, sartzeko pabiloi bat eraikiko da, arrapala batekin, kalearen eta nasaren arteko ibilbidea irisgarria izan dadin.
