Danborrak astintzera datorren gazte kuadrilla
Aurtengo San Sebastian egunak Mamelena danborrada ezagutzeko aukera emango die donostiarrei. Mamelena elkarte gastronomikoko gazteek osatzen dute, eta 75 neska-mutil aterako dira larunbat eguerdian danbor eta upel berriak Amara Berrin zehar jotzera.
Mamelena danborrada, Peñaflorida institutuan entseatzen.Mamelena danborrada 
Amara Berriko Mamelena elkarte gastronomikoak 25 urte beteko ditu aurten, eta urtemuga biribil hori ospatzeko modu bikaina aurkitu dute bertako hainbat kidek: Mamelena danborrada sortzea. 2020ean bururatu zitzaien idea, baina pandemiaren ondorioz, 2023ra atzeratu behar izan zuten prestaketa guztia. Ion Alkorta (Amara, 1996) danborradaren zuzendaritzako kideak azaldu ditu xehetasun guztiak: “Duela 25 urte elkartea sortu zutenen hainbat seme-alaba gaude Mamelenan, eta baita beste gazte asko ere. Faltan sumatzen genuen danborrada bat izatea elkartean. Auzoan asko daude, eta bururatu zitzaigun guk geurea muntatzea”.
Horiek horrela, 2023ko abuztuan astindu bat eman zioten danborradaren kontuari, eta guztia prestatzen hasi ziren. “Lehenengo urtea da, eta hasieran ez genuen jenderik danborradan parte hartzeko. Orduan, abuztu aldera hasi ginen Instagram bidez mezua zabaltzen danborrada berria sortu genuela esanez, eta lagunen artean ere komentatzen hasi ginen”, azaldu du Alkortak. Izan ere, Donostiako Festak-en araudia begiratu zuten, eta ohartu ziren danborrada berria sortzeko gutxienez 63 pertsonak eman behar zutela izena. Instagram bidez mezua zabaldu ostean, izen emate orri bat prestatu zuten, eta ia 100 lagun animatu ziren. “Aurrekontu bat atera genuen arropak erosi ditugun dendarekin, eta dirua eskatu genion apuntatu zen jende horri guztiari. Izen ematea 200 euroan jarri genuen, eta hor dena sartzen zen: danborradako izen ematea, jantziak, danborra… eta bakoitzarena da guztia. Danborra, adibidez, bakoitzak bere etxera eramaten du, ez daukagulako tokirik gordetzeko”, zehaztu du Alkortak.
Behin dirua eskatuta, azkenean 75 pertsona animatu ziren. Gutxi gorabehera, gizonezkoen eta emakumezkoen kopurua berdinduta dago, erdi eta erdi izango direlako. Mamelena danborradako kideak Jaiak izeneko Iruñeko txarangarekin aterako dira San Sebastian egunean. “Aste honetan entsegu orokorra izan dugu beraiekin, eta egia esan, oso gustura gaude. Oso animatuak dira beraiek ere. Egia esan, danborrada gaztea gara, gehienok hogeitaka urte ditugulako. Badago 30-40 urte bitarteko jendea ere, baina ez gehiegi”, azaldu du Alkortak.
Lan handia eskatzen duen antolakuntza
Danborradaren zuzendaritza zazpi pertsonek osatzen dute, eta zazpien artean eramaten dute dena, “bakarrik eramatea ezinezkoa delako”. Alkorta bera jarri dute arduradun gisa, baina bakoitzak bere funtzioak ditu: “Leticia Rodriguez eta Rocio Gutierrez arropaz arduratu dira, adibidez. Donostiako Danborrada izeneko dendarekin harremanetan jarri dira, eta jantziak ikustera joan dira. Detaile batzuk aukeratu dituzte, zapiak zein koloretakoak nahi ditugun, eta banderez ere arduratu dira. Danborrak eta upelak ere enpresa horrekin hartu ditugu. Beste kide bat, Gorka Prior, arduratu da denborarekin txaranga bat lortzeaz, eta beste kide batzuk denean laguntzen egon dira”.
Alkortaren esanetan, “ikusten ez den lan asko” dago danborradaren atzean: “Esaterako, Peñaflorida institutuan entseatzen dugu, eta makilak, bozgorailua eta hainbat gauza eraman behar dira. Hori guztion artean egiten dugu”.
Aipatu moduan, arropak zehaztuta dituzte bihar dotore irteteko, eta sukaldariz jantzita ikusiko ditugu Mamelena danborradako kideak. Txaketa zuria, koadrotxo urdin ilunak dituzten galtzak eta zapi urdina eramango dituzte, bordatu zuriarekin. “Horrez gain, aukera eman genien neskei nahi zutenak urketari gisa joateko, eta hamar neska irtengo dira horrela. Gainera, bi gastadore ere izango ditugu, traje bereziekin”, zehaztu du Alkortak.
Mamelena danborradako kide asko aurretik beste danborrada batzuetan ateratakoak dira, baina denetarik dagoela azaldu du zuzendaritza taldeko kideak: “Emakume bat Bilbokoa da, orain Donostian ari da bizitzen, eta gure danborradan eman du izena. Berarentzat danborrada batean aterako den lehenengo aldia da. Gainera, neska eta mutil bat ere kanpokoak dira, baina Donostian bizi dira, eta beraientzat ere lehen aldia da. Gure lagun baten bitartez animatu ziren. Bestalde, ni adibidez, azken sei urteotan Kresala Gazte Danborradan atera naiz, eta nire kuadrillako asko ere bai”.
Amara Berri girotzera datoz
Larunbat eguerdian, 12:00etan aterako da Mamelena danborrada Amara Berriko Ikasketa plazatik, Los Javis tabernaren paretik. Isabel II.a etorbidea zeharkatuko dute jarraian, eta hortik Armeria plazara joango dira, Amara Berriko agertokia kokatu duten lekura. Hortik Ferreriasera abiatuko dira, eta Madril etorbidera sartuko dira jarraian. Ikasbide elkartera joango dira, Probestu plazara, eta hortik Illunbe kalera eta Toribio Altzaga kaleko Chopper tabernara.
Jarraian, Urtoki elkartera joango dira eta, ondoren, buelta osoa emango diote Arcco merkataritza zentroari. Amaitzeko, Gregorio Ordoñez kaletik beraien elkartera, Mamelenara, sartuko dira. Danborrada 15:45 aldera bukatuko dutela aurreikusten dute. “Amaitzen dugunean, elkarrekin bazkalduko dugu guztiok. Amara Berriko taberna batekin hitz egin dugu, eta bokatak prestatuko dizkigute”, azaldu du Alkortak.
Denbora luzez itxaron ostean, iristear da egun handia Mamelena danborradarentzat. Larunbatean, Donostiako egun handian, danborrak, upelak, jantzi eta bandera berriak estreinatuko dituzte, eta orain arte egindako lan guztiak merezi izan duela uste dute. “Danborrada iristeko gogoz gaude, ilusioz beteta”, baieztatu du zuzendaritza taldeko kideak. Halaber, lan handiena egin dutenez, datorren urteko antolaketa “errazagoa” izango dela uste dute.
