'Tales From The Earth' lana argitaratu dute Ancient Settlers donostiarrek
Ancient Settlers heavy metal boskote donostiarra.Basque Metal Country 
Ancient Settlers Donostiako heavy metal boskoteak Tales From The Earth EP-a argitaratu du, lanaren izen bereko singlearekin batera, Lur Burns Red (A Dark Reborn) abeslariaren kolaborazioarekin ondutakoa. EP-a plataforma digitaletan dago entzungai, eta formatu digitalean zein fisikoan salgai dago.
Basque Metal Country egitasmoak ohar baten bidez azaldu duenez, planeta osoko “kulturen eta naturen aberastasunean” oinarritu dira lan akustiko hau osatzeko, eta “letrak zibilizazioaren patuari buruzko bidaia filosofiko bat dira”. “Lan labur akustiko hau taldearen sormenaren bilakaeraren lekukoa da. Entzuleak liluratzea du helburu esperientzia akustiko paregabe eta zoragarri baten bitartez. Naturan zuzenean grabaturiko soinuak erabili dituzte, eta hiru hizkuntzetan jaso dituzte kontakizun batzuk: ingelesez, euskaraz eta kitxuaz”, gehitu dute. Zortzi abestiko EP-a da, Agustin Martinezek Rockline estudioetan nahastu eta masterizatutakoa. Azalari dagokionez, The Kraken Artworksek egin du.
Ancient Settlersen ‘Tales From The Earth’ diskoaren azala.Basque Metal Country
Bestalde, taldea iraupen luzeko bigarren diskoaren grabazioa bukatzen ari da. Our Last Eclipse estreinako diskoan egin zuten moduan, bi Grammy dituen Fredrick Nordstrom (At The Gates, In Flames, Opeth, Architects, eta abar) arduratu da ekoizpenaz, eta nahasketa eta masterizazioa Suedian dituen Fredman estudioetan egin dute. Bestalde, Jon Toussasek (Suicidal Angels, Nightrage, Mors Principium Est, eta abar) ilustratzaileak egingo du disko horren azala, Transition lan laburrean egin zuen moduan.
Argen Death (ahotsa), Carlos Chiesa Estomba (gitarra eta ahotsak), Agustin Martinez (gitarra), Miguel Herrera (baxua) eta Herman Riera (bateria) dira Ancient Settlerseko taldekideak.
